O‘zbekistonning Birinchi prezidenti Islom Karimovning birinchi xotinidan ko‘rgan o‘g‘li Pyotr ish beruvchidan haqini undirib berishni so‘rab Moskva shahar Tver sudiga murojaat qildi.
"Sud mahkamasi 24 oktabrga tayinlandi"
Tverskoy tuman sudi rasmiy vakili, Ozodlik savoliga javoban, Karimov familiyali fuqaro «O‘zbekiston havo yo‘llari» aviakompaniyasi ustidan arz qilganini tasdiqladi.
- Karimov familiyali da’vogar bizda bor. Ammo u sobiq prezidentning o‘g‘limi, yo‘qmi - men bilmayman. Sud majlisi 24 oktabr soat 10:30 ga tayinlandi. Javobgar – «O‘zbekiston havo yo‘llari» milliy aviakompaniyasi, dedi Tverskoy tuman sudi raisi muovini Anastasiya Dzyurko.
Ommaviy axborot vositalariga sizdirilgan ma’lumotlarga ko‘ra, Pyotr Karimov “O‘zbekiston havo yo‘llari” milliy aviakompaniyasida bir necha yil yuqori lavozimda ishlab kelgan va 2016 yilda otasining o‘limidan so‘ng ishdan bo‘shatilgan. Biroq, Pyotr ishdan bo‘shatish paytida unga berilishi lozim bo‘lgan pul mablag‘ini aviakompaniya unga to‘lamaganini iddao qilmoqda.
Pyotr Karimov o‘ziga to‘lanishi lozim bo‘lgan pulni sud orqali undirmoqchi.
Ayrim nashrlarning “O‘zbekiston havo yo‘llari”ning matbuot kotibi Zumrad Shojalilovaga tayanib xabar qilishicha, kompaniya 10 oktabr kuni Pyotr Karimovga u bilan sobiq xodim sifatida to‘liq hisob-kitob qilingani to‘g‘risida bildiruv yuborgan.
Pyotr Karimov haqida nima ma’lum?
O‘zbekistonning marhum prezidenti Islom Karimovning rasmiy tarjimai holida Pyotr Karimov ismli uchinchi farzandi borligi aks ettirilmagan.
Masalan, O‘zbekiston Respublikasi Markaziy saylov komissiyasi rasmiy saytida e’lon qilingan tarjimai holda bunday deyilgan:
“U (Islom Karimov) oilali, ikki nafar farzandi, to‘rt nabirasi bor. Rafiqasi T. A. Karimova - mutaxassisligi iqtisodchi, iqtisod fanlari nomzodi, O‘zbekiston Fanlar akademiyasi Iqtisodiyot institutida katta ilmiy xodim bo‘lib ishlagan, ayni paytda – pensiyada”.
«Vikipediya» ma’lumotiga ko‘ra, Islom Karimov o‘tgan asrning 60-yillarida birinchi marta uylangan.
U birinchi rafiqasi Natalya Petrovna Kuchma bilan turmushidan bir o‘g‘il ko‘rgan. Islom Karimovning o‘g‘li Pyotr Islomovich Karimov 1969 yilda tug‘ilgan. Ammo prezidentning rasmiy biografiyasida ushbu nikoh va uning birinchi farzandi nomi keltirilmaydi.
Islom Karimov keyinroq Tatyana Akbarovna Karimovaga uylangan. Bu nikohdan ikki qiz tug‘ilgan - Gulnora Karimova (1972 yilda tug‘ilgan) va Lola Karimova (1978).
Pyotrning onasi Natalya Kuchma 2008 yilda Toshkentda vafot etgan.
Pyotr Karimov, ayni vaqtda, Moskva viloyatida istiqomat qiladi. Iqtisodchi kasbiga ega Pyotr Karimov birmuncha vaqt «Aziya-Invest» bankida boshqaruv raisi muovini lavozimida ham ishlagani ma’lum.
