Andijon shahridagi avtomobillar uchun butlovchi qismlar ishlab chiqaradigan "UZ DONG YANG CO" O‘zbekiston-Koreya qo‘shma korxonasining nolikvid detallar ombori mudiri, 29 may kuni o‘zini osgan buloqboshilik 34 yashar Hasanboy Ikromovnig onasi Amatxon Norboyeva OzodMikrofon bilan bog‘lanib, o‘g‘lining o‘limida taftishchilarni aybladi.
Nafaqadagi o‘qituvchi¸ xalq maorifi a’lochisi 61 yashar Norboyeva OzodMikrofon bilan suhbatda o‘z o‘g‘lining 2019 yildan to 2020 yil mayigacha davom etib kelayotgan taftishlardan "jonidan to‘yganini" iddao qildi.
- Ozodlikda nusxasi bo‘lgan Bosh prokuratura ma’lumotnomasida yozilishicha¸ Bosh prokuratura Ikromov ishlagan qo‘shma korxonada o‘z tekshiruvini 2019 yilning boshida ham o‘tkazgan va o‘shanda Ikromov javobgar deb topilgan. Ma’lumotda yozilishicha, "Qo‘shma korxonadagi ayni kunlardagi tekshiruv esa, ichki audit xodimlari tomonidan amalga oshirilmoqda".
- Bosh prokuratura ma’lumotnomasida "korxonada prokuratura tekshiruv boshlagani ortidan o‘z joniga qasd qilganiga oid xulosani chiqarishga erta ekanligi va ayni paytda holat bo‘yicha tergovga qadar tekshiruv harakatlari davom etayotgani" ta’kidlanadi.
Amatxon Norboyeva OzodMikrofonga bunday dedi:
«O‘g‘limning shunday holatga tushishiga sabab ishxonadagi taftish va olib borilayotgan tergovdagi qo‘pol muomala bo‘lgan. O‘g‘lim bu nohaqliklarga chiday olmay 2020 yil 29 may kuni o‘z uyidagi ayvonga osilgan holatda topildi. Shundan so‘ng, bu qilmishiga ishonmay mobil telefonini ko‘rib chiqqanimda ishlayotgan korxonasidan tez yetib kel degan sms xabar va qo‘ng‘iroqlar bo‘lganligining guvohi bo‘ldim»
"Kamomad aniqlangan"
- Bosh prokuratura matbuot xizmati rahbari Hayot Shamsutdinov Ozodlikka taqdim qilgan ma’lumotnomada aytilishicha "UZ DONG YANG CO" qo‘shma korxonasida 2018-2019 yillar davomida xom ashyo va materiallarning saqlanishi, tarqatilishi va butligi yuzasidan tekshirish o‘tkazilganligi rost:
- «Tekshiruvlar bir yoki ikki oy avval emas, o‘tgan 2019 yilning boshida o‘tkazilgan. O‘shanda Ikromov. moddiy javobgarligida bo‘lgan 168 mln. so‘mlik xom ashyo va materiallardan kamomad aniqlangan (marhum 2013 yildan beri ombor mudiri bo‘lib ishlab kelgan) va o‘z vaqtida (Ikromov tomonidan) bartaraf etilgan».
"Kamomadning o‘rni to‘ldirilgan"
Marhumning egizi Husanboy va onasi Amatxon ayaning Ozodlikka aytishicha¸ qarindosh-urug‘dan qarz ko‘tarib¸ kamomad o‘rnini to‘ldirishgan. Bu qarzni to‘lash uchun shu kunda marhumning mashinasi sotuvga chiqarilgan. Amatxon aya:
«Moshinani moykaga oborib sotuvga tayyorladik. Odamlardan olgan qarzni albatta uzamiz. O‘g‘lim go‘rida tinch yotsin. Lekin davlat belgilagan jarimani to‘laganmiz. 2019 yil 1 avgust kuni o‘g‘lim menga “tekshiruv natijasida 174 mln 800 ming so‘m kamomad aniqlanganligi uchun prokuratura menga 174 mln 800 ming so‘m jarima soldi” dedi. Men farzandini o‘ylagan ona sifatida, “to‘laymiz, qarindosh-urug‘, do‘st-yorlardan topamiz” dedim. “O‘g‘lim adolat albatta qaror topadi, bu puling albatta qaytadi deganman”. “Agar 3 kun muddatda to‘lov qilinmasa, meni qamab qo‘yar ekan” dedi. 2019 yil 1 avgustda jarimani to‘lash haqida aytilgan bo‘lsada, 2020 yil may oyigacha tergov tugab, sud hukmi o‘qilmadi. Farzandim Hasanboy bu davrda na turmush o‘rtog‘iga, na onasiga ichidagi dardlarini ayta oldi. Korxonaning har bir burchagida kuzatuv kamerasi bo‘lsada, o‘g‘rilik qilmagan fuqaroga jinoyatchi sifatida qarashgan va ma’naviy hamda ruhan ezishgan. Shunchalik tazyiq o‘tkazilganki, inson huquq va erkinliklari buzilishiga olib kelingan.174 800 000 so‘mni 3 kun muddatda emas sakkiz kunda to‘ladim».
"Bir boltni ham o‘g‘irlamagan"
OzodMikrofon bilan suhbatda Amatxon Norboyeva o‘g‘lining «yemagan somsaga pul to‘lagan¸ aybsiz aybdor sifatida» dunyodan o‘tib ketganini iddao qildi:
“O‘g‘lim, axir sen o‘qituvchining farzandisan, nimaga bunday holat bo‘lyapti” desam, “agar men zavodni 1 ta boltini o‘g‘irlagan bo‘lsam, qo‘pol qilib aytganda uyimizdagi xojatxonani suvog‘ini bitkazardim” deb javob bergandi. 2011 yilda qurishni boshlagan Shohguzar MFY Uchqun ko‘chasida joylashgan 8 sotihli uyi xali ham bitgan emas. Uka siz muxbiringizni yuboring o‘z ko‘zi bilan ko‘rsin uyning ahvolini. Oshxona va hammom haliyam qurilmagan. Men tazyiq va zo‘ravonlikga uchrab o‘z joniga qasd qilgan farzandning mushtipar onasiman. Men buni ko‘zimda yosh, dard alam bilan aytyapman. 2 nafar norasida go‘dak, 32 yoshli beva kelinimni qayg‘u alamlarini ko‘rib, chidab tura olmasdan, farzandimni ruhini poklash, maqsadida haqiqat ro‘yobga chiqishini istayman. Men bu gaplarimni qog‘ozga tushirib O‘zbekiston prezidentiga ham yubordim. O‘g‘limni tergov qilgan tergovchi mansabini suiiste’mol qilgan. Tergov davomida tazyiq va zo‘ravonlik ishlatgan. “Oilangni xarom luqma bilan boqyapsan!” deb malomat qilgan. O‘zbekiston Respublikasi Konstitutsiyasining 26-moddasida “Jinoyat sodir etganlikda ayblanayotgan har bir shaxsning ishi sudda noqonuniy tartibda, oshkora ko‘rib chiqilib, uni aybi aniqlanmaguncha aybdor hisoblanmaydi. Hech kim qiynoqqa solinishi, zo‘ravonlikka, shafqatsiz yoki inson qadr-qimmatini kamsituvchi boshqa tarzdagi tazyiqqa duchor etilishi mumkin emas deb aniq yozilgan. Konstitutsiyadagi huquqlar kafolati bo‘lgan prezident adolat qiladi deb umidvorman".
"Shirkat yordam bermadi"
- "UZ DONG YANG CO" shirkati vakili marhum Hasanboy Ikromov oilasiga shirkat moddiy yordam berayotganligini Ozodlikka 4 iyun kuni aytib bergan edi.
Marhumning onasi Amatxon ayaning OzodMikrofonga aytishicha¸ korxona vakillari ta’ziyaga kelib duo qilishdan nariga o‘tmagan:
«Ikkita non obkelishmadi. Ikkita non nima degan gap?! Bugun 5 iyun, o‘g‘limning vafot etganiga 7 kun bo‘lmoqda. Shu kungacha na rahbariyat, na kasaba uyushmasi moddiy yordam bermadi. Nahotki, insonning qadr-qimmati 7 yillik mehnati sarflangan, tashkiloti uchun ahamiyatsiz bo‘lsa? Men farzandimni oq yuvib, oq tarab, xalol-pok yedirib, yurtimiz uchun foydasi tegadigan vijdonli iymon-insofli qilib tarbiyalab, davlat granti asosida o‘qitdim. O‘g‘lim Hasanboyniing ortida 10 yashar Zahro¸ 5 yashar Zebo qizi chirqirab qoldi. Bankdan ham qarz olgan kamomadni to‘layman deb».
"O‘g‘lim xayotni sevardi"
Marhumning onasi OzodMikrofon bilan suhbatda o‘z o‘g‘lining ruhan va jisman sog‘lom bo‘lgani, suitsidga moyilligi bo‘lmagani¸ tergovchilar bosimi ostida o‘z joniga qasd qilganini qayta-qayta iddao qildi:
«O‘g‘lim o‘lganidan keyin cho‘ntagidan chiqqan telefonda xotini Nilufarxonga yozgan ammo yuborilmagan sms maktubni o‘qidim. «Qizlarimni sevaman» deb yozilgan edi. Xasanboy hayotni sevar edi, oilasini ham. Ayniqsa, farzandlarini yeru ko‘kka ishonmas edi. Farzandimning so‘nggi so‘zi va ichidagi dardlarini eshita olmagan ona sifatida o‘zimni qo‘yarga joy topa olmayapman».
Taftish davom etmoqda
- O‘zbekiston Bosh prokuraturasi ma’lumotiga ko‘ra¸ shu kunlarda marhum Ikromov ishlagan qo‘shma korxonada ichki audit xodimlari tomonidan tekshiruv o‘tkazilmoqda:
- «Shu yilning 21 may kuni «"UZ DONG YANG CO» MChJ shaklidagi qo‘shma korxona rahbari vazifasini vaqtincha bajaruvchisining 50-sonli buyrug‘i chiqarilgan bo‘lib, unga asosan Ikromov javobgarligidagi tovar moddiy boyliklarini boshqalar zimmasiga yuklash hamda 20 may holatigacha taftish o‘tkazish uchun ishchi guruh tuzilgan. Shuningdek, mazkur buyruq bilan inventarizatsiyadan o‘tkazish uchun tekshirish boshlangan»
- Andijon shahridagi avtomobillar uchun butlovchi qismlar ishlab chiqaradigan "UZ DONG YANG CO" O‘zbekiston-Koreya qo‘shma korxonasining nolikvid detallar ombori mudiri, 34 yashar Hasanboy Ikromov 29 may kuni o‘z hovlisida osilgan xolda topilgan edi.
