Қозоғистондаги вазиятга оид тафсилотларни жонли эфирда кузатинг:
Қозоғистондаги намойишчиларни қўллаб дунёнинг бир қанча шаҳарларида акциялар ўтмоқда
Бишкекда қирғиз ҳарбийларини Қозоғистонга жўнатмаслик талаб қилинган пикет ўтказилди
Қирғизистон парламенти биноси олдида 6 январь куни бир гуруҳ фаоллар қирғиз ҳарбийларини Қозоғистонга жўнатмаслик талаби билан пикет ўтказди. Озодлик радиоси қирғиз хизматининг билдиришича, пикетда 20 нафардан ортиқ фаол иштирок этди.
“Қирғизистон аскарлари Қозоғистонга жўнатилмасин. Қозоғистонга ташқаридан агрессия бўлмади, қозоқ халқи ўз ички ишини ўзи ҳал қилиши лозим”, - деб билдиришди пикетчилар.
Фаолларнинг айримлари Қирғизистон Коллектив хавфсизлик шартномаси ташкилотидан чиқишини ҳам талаб қилмоқда.
Қирғизистон парламенти қирғиз ҳарбийларини КХШТ таркибида Қозоғистонга киритиш юзасидан 6 январь куни қарор қабул қила олмади. Бу масалани муҳокама қилиш 7 январга қолдирилди.
КХШТга Арманистон, Беларусь, Қозоғистон, Россия ва Тожикистон аъзо давлат ҳисобланади. 5 январь куни ташкилотга раислик қилаётган Арманистон Бош вазири Никол Пашинян КХШТ кучлари Қозоғистон президенти Қасим-Жомарт Тоқаев илтимоси билан киритилаётганини билдирган эди.
Айни пайтда Қозоғистонга Россия ҳарбийлари киритилди.
Ўзбекистон ва Тожикистон президентлари Қозоғистондаги вазиятни муҳокама қилди
5 январдан эътиборан таътилга чиққани маълум қилинган Ўзбекистон президенти Шавкат Мирзиёев 6 январь куни Тожикистон раҳбари Эмомали Раҳмон билан телефон орқали мулоқот қилди. Мулоқот давомида “Қозоғистонда вужудга келаётган ҳолат юзасидан фикр алмашинди”.
Ўзбекистон президенти матбуот хизматининг билдиришича, икки мамлакат етакчилари ҳозирги воқеаларнинг иштирокчиси бўлган томонларни вазминликка ва вужудга келган масалаларни тинч йўл билан ҳал қилишга чақирдилар.
Аввалроқ Шавкат Мирзиёев Қозоғистон президенти Қасим-Жомарт Тоқаев билан телефон орқали мулоқот ўтказгани хабар қилинган эди.
Мирзиёев Қозоғистоннинг биродар халқи ва раҳбариятини уларнинг мамлакат барқарорлиги ва фаровонлигини таъминлаш йўлидаги саъй-ҳаракатларида доимо қўллаб-қувватлашини яна бир бор тасдиқлаган.
Янги йил бошидан суюлтирилган газ нархи оширилишига қарши Қозоғистон ғарбида бошланган норозилик тўлқини 3 кун ичида бутун мамлакат бўйлаб ёйилган.
Норозиликлар ортидан 5 январда ҳукумат истеъфога кетган ва аввалги президент Нурсултон Назарбоев Хавфсизлик кенгаши раиси лавозимидан озод қилинган, шунингдек, қатор расмий идораларда етакчи кадрлар алмаштирилган.