Херсон кўчаларига Россия зирхли техникаси кириб келди
Херсон кўчаларига Россия зирхли техникаси кириб келгани тўғрисидаги маълумотни вилоят губернатори Геннадий Лагута "Украинской правда"га берган интервьюсида тасдиқлади. Аммо шаҳар ҳамон Украина ҳукумати ва ҳарбийлари назоратида экани айтилмоқда.
1 мартга ўтар кечаси Россия армияси Украина жанубидаги Херсон шаҳрини қуршовга олгани, шаҳар артилерия томонидан ўққа тутилаётгани тўғрисида хабар берган эди.
Россия ҳарбийларининг 65 километрлик колоннаси Киев томон йўналмоқда
Беларусь чегараси томонидан 28 февраль куни Киевга қараб йўл олган Россия ҳарбий колоннасининг узунлиги 65 километрни ташкил қилмоқда. Бу ҳақда Maxar хусусий ширкати сунъий йўлдоши олган фотосуратлар гувоҳлик бермоқда. Вашингтон Украина пойтахтига ҳужумнинг иккинчи тўлқини тайёрланаётгани тўғрисда маълум қилди.
Колонна зирхли техника, таклар, артилерия, юк машиналаридани иборат. Улар Киевга аскарлар ва ёнилғи олиб кетмоқда. 1 март ҳолатига кўра, Россия колоннасининг қаерда экани тўғрисида маълумот йўқ.
АҚШ сенатори Крис Мёрфи Конгресс аъзолари учун ўтказилган ёпиқ брифингдан сўнг твиттер саҳифасида Россия ҳарбийлари яқин ҳафталар ичида Киевни қамал қилишни режалаштираётгани тўғрисида ёзди.
“Шаҳар учун жанг узоқ ва қонли бўлади, украинлар кўча жангларига тезкор тайёргарлик кўрмоқда”,-деб билдирди сенатор.
Рамзан Қодиров Украинада чеченистонлик ҳарбийлар ўлганини эътироф этди
Чеченистон раҳбари Рамзан Қодиров Украинадаги жангларда чеченистонлик икки нафар ҳарбий ҳалок бўлгани, яна 6 нафари турли даражада тан жароҳати олганини маълум қилди.
“Ҳа, урушда одамлар ўлдирилади ва бу уларнинг касбий танлови эди. Бу йигитлар икки мамлакат хавфсизлиги учун жон фидо қилган қаҳрамон бўлишни танлашди. Уларга Украина тинч аҳолиси ичида талафотларни минимумга тушириш ҳақида буйруқ берилганди ва улар буйруқни бажаришди…”, деб ёзган Р. Қодиров ўз Телеграм-каналида.
Унга кўра, Росгвардиянинг Чеченистон бўйича қўшинлари энг янги техника ва аслаҳалар билан қуролланган, жисмоний жиҳатдан яхши тайёргарликдан ўтган, “ҳар қандай қийин буйруқни ҳам бажаришга шай”.
“Ва мен ортиқча такаллуфсиз янги буйруқ берилиши лозим, деб ҳисоблайман. Миллатчилар ва террорчиларни йўқ қилиш, шаҳарларни озод қилиш бўйича кенг кўламли тартибларга ўтиш лозим”, деб ёзган Рамзан Қодиров.
У Чеченистонда туғилган ва “ғоя ёки пулга алданган” украиналик ҳарбийларга “Ватандаги тинч ҳаётга қайтиш”ни таклиф қилган.
Тўпга тутилган Ахтиркада 70 нафар украиналик ҳарбий нобуд бўлди
Украинанинг Суми вилояти Ахтирка шаҳридаги ҳарбий қисмнинг Россия артиллерияси томонидан нишонга олиниши оқибатида камида 70 нафар украиналик ҳарбий ҳалок бўлган. Бу ҳақда Суми вилоят маъмурияти раҳбари Дмитрий Живицкий маълум қилди.
“Душман артиллерияси ҳарбий қисмга ўқ ёғдирди. Вайроналар остидан жасадларни олиб чиқиш давом этмоқда. У ерда шаҳар фавқулодда вазиятлар хизмати вакиллари, кўнгиллилар ишлаяпти. Ўлганлар кўп. Ҳозир қабристонда вафот этган 70 нафар украиналик жангчи учун жой тайёрланмоқда. Қурбонларимиз ҳақидаги маълумотларни ҳозирлаяпмиз. Бироқ душман ҳам қилмишига яраша жазо оляпти. Шаҳар бўйлаб россияликларнинг жасадлари жуда кўп эди, уларни йиғиштиряпмиз. Уларни Қизил хоч жамияти вакиллари уйларига олиб кетяпти”, дея маълум қилган Живицкий.