Россия ва Украина олти кунлик ҳарбий талафотлар тўғрисида маълумот берди
Россия олти кунлик жанглар давомида Украинанинг 1325 ҳарбий объектини ишдан чиқаргани тўғрисида Москвада ўтган брифингда мудофаа вазирлиги расмий вакили Игорь Конашенков маълум қилди.
Унга кўра, рус ҳарбийлари Украинанинг 395 танки ва бошқа зирхли техникасини, 59 та ракета тизимини ва 179 та замбарак ҳамда миномётларини йўқ қилган.
Украина Мудофаа вазирлиги эса 1 март ҳолатига кўра, Россия армиясининг 29 самолёти, 29 вертолёти, 198 танки, 846 зирхли техникаси, 305 автомашинаси, 74 замбараги, 1 “Ьук” зенит-ракета комплекси, 77 замбараги, 24 ракета тизими, 60 цистернаси, 3 дрони, 2 кемаси, 7 та ҳаводан ҳимоя тизими йўқ қилингани ҳақида билдирди.
Украина Мудофаа вазирлигининг билдиришича, олти кун ичида Россиянинг ҳалок бўлган, яраланган ва асирга олинган аскарлари сони 5710 кишига етган.
Россия Украинада ҳалок бўлган аскарлари борлигини тан олди, бироқ уларнинг сонини очиқ айтмади.
Россия яна 4 аскари Украинада ҳалок бўлганини тан олди
Россиянинг Кабардин-Балкар Республикаси раҳбари Қуролли кучлар сафида Украинада жанг қилаётган 4 фуқароси ҳалок бўлганини тан олди.
Республика раҳбари К.Коков ҳукумат расмий сайтида “Донбассни ҳимоя қилиш махсус амалиёти пайтида хизмат бурчини бажариб ҳалок бўлган” 4 ҳарбийнинг оиласига таъзия билдирди.
Аввалроқ Россиянинг Ульяновск вилояти, Краснодар ўлкаси, Қалмиқ, Доғистон ва Чеченистон Республикалари раҳбарлари ўз ҳудудида яшаган ва “махсус амалиёт”да иштирок этган шахслар ҳалок бўлганини билдирган эди.
Украина томонининг билдиришича, шу кунгача Россиянинг камида 5 минг аскари ҳалок бўлган. Россия Мудофаа вазирлиги 27 февраль куни Украинада ҳалок бўлганлар борлигини тан олди, бироқ уларнинг сонини очиқламади.
Европа парламенти Украинани ЕИга қабул қилиш истиқболларини муҳокама қилишни бошлади
Европа парламенти 1 мартдан бошлаб Россиянинг Украинага бостириб кириши ва Украинанинг Европа Иттифоқига қабул қилиш масаласини муҳокама қилишни бошлади.
Украина президенти Владимир Зеленский Европа парламенти йиғилишида видеоалоқа орқали нутқ сўзлади. У ўз сўзида рус ҳарбийлари Харьковда тинч аҳолини бомбардимон қилгани, кўплаб одамлар, жумладан, болалар ҳалок бўлганини таъкидлади.
"Биз Европанинг тўлақонли аъзоси бўлиш учун курашмоқдамиз. Европа Иттифоқи биз билан кучлироқ бўлади. Биз билан бирга эканингизни исботланг, ўзингизнинг европалик эканингизни исботланг, шунда ҳаёт ўлимни, ёруғлик эса зулматни енгади”,-деди Зеленский.
Европарламент депутатлари Зеленский нутқини якунлаганидан сўнг ўринларидан туриб гулдурос қарсаклар чалди.
Бир кун олдин Зеленский Украинанинг Европа Иттифоқига аъзоликка қабул қилиш тўғрисидаги аризани расман имзолаган эди.
Харьков бош майдони Россия томонидан бомбардимон қилингани оқибатида камида 10 киши ҳалок бўлди
Харьков бош майдони рус ҳарбийлари томонидан қанотли ракета билан бомбардимон қилингани оқибатида, тинч аҳоли орасида камида 10 киши ҳалок бўлди, 20 киши яраланди. Бу ҳақда Фавқулодда ҳолатлар хизмати маълум қилди.
Россия ҳарбийлари 1 март куни Харьков марказини, жумладан, бош майдонни бомбардимон қилганди. Президент Зеленский мазкур бомбардимон ортидан Россияни “террорчи давлат” деб эълон қилди.