7 март куни Ҳаага суди геноцидда айбланаëтган Россия ишини кўриб чиқишни бошлайди
БМТнинг Ҳаагадаги Халқаро жиноят суди Украинанинг Россия устидан берган даъво аризасини душанба куни кўриб чиқишга киришади.
Бу ҳақда Нидерландия қироллигининг Буюк Британия ва Ирландиядаги элчиси Карел вон Остером ўз Twitter саҳифасида эълон қилди.
"Ҳаага Тинчлик саройида жойлашган Халқаро жиноят суди Украинанинг Россияга қарши берган сўрови бўйича эшитувларни 7 март куни бошлайди"¸ деб ëзди нидерландиялик дипломат.
27 февраль куни Украина Нидерландиянинг Ҳаага шаҳрида жойлашган БМТ судига Россияни геноцидда айблаб¸ даъво аризаси киритган ва президент Зеленский суд ҳайъатидан бу аризани зудлик билан кўриб чиқишини сўраган эди.
Россия зиëлилари ўз ҳарбийларидан Путин буйруғини бажармасликни сўради
Россия мухолифати ва зиëлилари тузган Аксилҳарбий комитет 1 март куни Россия ҳарбий қўмондонлиги вакиллари¸ Украина урушида қатнашаëтган россиялик ҳарбийларга мурожаат қилди.
Хусусан¸ Путин томонидан жанговор ҳозирлик ҳолатига келтирилган стратегик ядровий қисмда хизмат қилувчиларга йўлланган бу мурожаатда Украинадаги биродаркушлик урушини тўхтатиш¸ эҳтимолий жаҳон уруши¸ ядровий уруш олдини олиш сўралди.
«Балки россияликлар ҳали ҳам нималар бўлаëтганини тушунмагандир. Лекин сиз - Украинада урушаëтганлар - буни ўз кўзингиз билан кўриб турибсиз.
Сиз бировнинг ватанига босқин қилганингизни кўриб турибсиз. Сиз ўзингизни рус ва украинларни бункерда бекиниб ўтирган бир шахс шарафи учун ўлдиришга мажбурлашаëтганини кўриб турибсиз. Эртага сиздан Украина шаҳарларига қарши тактик ядро қуроли ташлаш ҳақида буйруқ беришларини эҳтимолдан соқит қилмаймиз¸ Тўхтанг. Жиноий буйруқни бажарманг. Путин Россия учун уруш қилаëтгани йўқ. У бу урушни фақат Путин учун қилаяпти. Унинг саройлари учун. Унинг лат еган ғурури учун. Унинг мутлақ ҳукмронлиги учун. Украинларни ўлдирманг. Россия келажагини йўққа чиқарманг. Ер шаримизни йўқ қилманг»¸ дейилади бу мурожаатда.
27 февраль куни Михаил Ходорковский, Дмитрий Гудков, Сергей Гуриев ва россиялик бошқа бир гуруҳ таниқли зиëли ва сиëсатчилар Россия Аксилҳарбий комитети тузилганини эълон қилди.
Комитет россияликларни нафақат Украина урушини тўхтатиш¸ балки Путиннинг агрессив диктатурасига қаршилик кўрсатиш учун бирлашишга чақирди.
Украинага босқин: 6-кун | 65 километрлик рус колоннаси
Зеленский НАТО дан Украина устидан учишни тақиқлашни сўради
Украина президенти Владимир Зеленский 1 март куни Россия ҳарбийлари ҳаво ва қуруқликдан ҳужумга тутаëтган Киев марказидан туриб CNN ва Reuters мухбирларига интервью берди.
Украинанинг Россия агрессиясига қарши жасоратли кураши фонида глобал майдонда қаҳрамонга айланган Зелинский суҳбати CNN сайтида “Мен эмас¸ Украина муқаддас” деган сарлавҳа билан тақдим этилди.
Макзур суҳбат давомида Зеленский ўт очмаслик масаласида музокара бошлашдан аввал Россия Украина шаҳарларини бомбалашни тўхтатиши лозимлигини таъкидлади.
Қаттиқ қўриқланаëтган ҳукумат биносида ўтказилган суҳбат давомида Зеленский шунингдек НАТО давлатларини Россия бомбардимонини тўхтатиш учун Украина ҳаво ҳудудини учиш тақиқланган зона деб эълон қилишга чақирди.
Зеленский бу сўровнинг НАТОни Россияга қарши урушга тортиш уриниши эмас¸ балки украин давлатчилиги ва халқини сақлаб қолиш учун кўриладиган чора эканини таъкидлади.
Reuters мухбирининг айтишича¸ суҳбат давомида Зеленский агар НАТО Россия босими остида Украина учун эшикларини ëпса¸ ўз мамлакати учун ҳуқуқий кучга эга хавфсизлик мажбурияти тақдим этилишини сўрашини билдирган.