Алишер Усмоновнинг 157 метрли яхтаси ҳибсга олинди
Германия маъмурлари Гамбург шаҳрида Европа Иттифоқи санкциялари жорий қилинган россиялик миллиардер Алишер Усмоновнинг 156 метрли яхтасини ҳибсга олди.
Бу ҳақда Forbes нашри хусусий кемалар бизнесига алоқадор уч манбадан олинган маълумотга таяниб хабар қилди.
Айтилишича, таги ўзбекистонлик миллиардернинг “Дилбар” аталувчи яхтаси қиймати 600 миллион доллардир. Яхта ўтган йилнинг октябридан буён Гамбургдаги Blohm+Voss кемасозлик заводида таъмирланаётган эди.
Forbes манбаларининг билдиришича, яхта ҳибсга олингани учун уни таъмирлаётган ишчилар чоршанба куни ишга чиқмаган. Нашр Алишер Усмоновнинг вакиллари воқеани ҳозирча изоҳламаганини хабар қилди.
Усмоновнинг яхтаси хос муаллифнинг оригинал лойиҳаси асосида 2016 йили қурилган, уни қуришга қарийб 5 йил кетган. “Дилбар” яхтасининг сув сиғими 16 минг тонна бўлиб, дунёдаги энг катта яхта ҳисобланади. Яхтада иккита ҳовуз, вертолёт қўнадиган иккита майдон ва бошқа шу каби иншоотлар бор.
Алишер Усмонов Россия Украинага бостириб киргани ортидан санкция жорий қтдинган россиялик йирик тадбиркорлар рўйхатига душанба куни киритилди.
3 мартга ўтар тунда Киев, Харьков ва бошқа шаҳарларга ҳаводан зарбалар берилди
3 март, соат 01:45 (Тошкент вақти) Россия Харьков шаҳрига ракеталар билан зарба бермоқда. Бу ҳақда “Настояшчее время” телекнали жонли эфирида воқеа жойидан олинган маълумотга таяниб хабар қилди. Россия кучлари отган ракетлардан иккитаси ҳудудий-мудофаа бўлинмаларидан (Россия агрессиясига қарши фуқаролар уюшган тузилма) бири жойлашган бинога теккан. Қурбонлар ҳақида хабар қилинмади.
Олдинроқ Украина пойтахти Киев шаҳридаги жанубий вокзалга ракета зарбаси урилгани хабар қилинган эди. 3 мартга ўтар тунда мамлакатнинг бошқа шаҳарлари ҳам ҳаводан ўққа тутилгани хабар қилинди.
БМТга аъзо 193 давлатдан 141 таси Россиядан Украинадаги урушни тўхтатишни талаб қилди
БМТ Бош ассамблеяси Россиянинг Украинага босқини қораланган ҳамда Москвадан ўз қуролли кучларини Украина ҳудудидан зудлик билан олиб чиқиб кетиш талаб қилинган резолюцияни маъқуллади.
Бу ҳақда хабар қилган Рейтерс агентлигига кўра, Бош ассамблея резолюциясини БМТга аъзо 193 давлатдан 141 таси қўллаб овоз берган.
Россия, Беларусь, Сурия, Корея халқ демократик республикаси (Шимолий Корея) ҳамда Эритрея қарши овоз берган.
35 давлат холис қолган. Улар орасида Хитой, Ҳиндистон, Жанубий Африка республикаси, Қозоғистон, Покистон, Эрон, Ироқ, Куба, Марказий Африка республикаси каби давлатлар бор.
Ўзбекистон овоз беришга қатнашмаган.
Овоз бериш натижаларини шарҳлар экан, сиёсатшунос Камолиддин Раббимов Фейсбукдаги постида бундай ёзди:
"35 давлат – бетараф қолган, жумладан, Тожикистон, Қозоғистон, Қирғизистон. Ўзбекистон ва Туркманистон умуман залда бўлмаган, овоз бермаган.
Ижобий хабар шуки, Марказий Осиёдаги бирон бир давлат, Россияни “агрессор эмас” деб овоз бермаган. Қўллаб-қувватламаган. Агар Россиянинг минтақадаги салоҳияти, таъсири инобатга олинса, бу овоз бериш – Россияга фақат ишончсизликни билдиради".
Резолюция Бош ассамблеянинг Украинадаги воқеалар муносабати билан шошилинч чақирилган йиғилишида қабул қилинди.
Россия Украинадаги урушда 498 ҳарбий хизматчиси ўлганини тан олди
Россия Мудофаа вазирлиги Украина ҳудудига Россия армияси бостириб кирганидан буён илк бор россиялик ҳарбийлар орасида кўрилган талафотлар ҳақида маълумот ьарқатди. Россия “Новости” ахборот агентлигининг вазирликка таяниб хабар қилишича, 498 россиялик ҳарбий ўлган, 1597 нафари яраланган.
Олдинроқ Украина Мудофаа вазирлиги 2 март ҳолатига кўра, Россия қўшини тортган талафотлар тўғрисида маълумот берган эди. Билдирилишича, уруш бошланганидан бери Украинада Россиянинг 5840 аскари ўлган, яраланган ва асирга олинган.
Бундан ташқари шу кунгача Россия 211 танк, 862 зирхли техника, 85 замбарак, 40 реактив ўқ отиш тизими, 9 ҳаводан ҳимоя тизими, 30 самолёт, 31 вертолёт, 355 автомашина, 2 та қайиқ, 60 цистерна ва 3 дронни йўқотган.
1 март куни Россия Мудофаа вазирлиги олти кунлик жанглар давомида Украинанинг 1325 ҳарбий объекти, 395 танки ва бошқа зирхли техникаси, 59 та ракета тизими ва 179 та замбарак ҳамда миномётлар йўқ қилинганини билдирган.
