Ўзбекистон ва Қозоғистон президентлари “геосиёсий таранглик вазиятида” ўзаро ҳамкорликни муҳокама қилди
Ўзбекистон президенти Шавкат Мирзиёев 3 март куни Қозоғистон Республикаси Президенти Қасим-Жомарт Тоқаев билан телефон орқали мулоқот қилди, деб хабар берди Мирзиёевнинг матбуот хизмати.
Ўзбек президенти матбуот хизматининг ёзишича, президентлар “дўстлик, стратегик шериклик ва иттифоқчилик муносабатларини янада мустаҳкамлаш, ўзаро манфаатли амалий ҳамкорликни кенгайтиришнинг долзарб масалалари”ни муҳокама қилди.
Қозоғистон президенти матбуот хизмати эса: “Икки давлат лидерлари айни пайтдаги геосиёсий таранглик вазиятида савдо-иқтисодий алоқаларнинг бугунги ҳолати”ни муҳокама қилгани ҳақида билдирди.
Қозоғистон президенти матбуот хизматининг билдиришича: “Президентлар янги таҳдид ва хавфларни бартараф этиш мақсадида икки мамлакат ҳукуматлари ўртасидаги ҳамкорликни янада ривожлантиришга келишиб олдилар”.
Зеленский Россия қўшинига қақшатқич зарба берилганини билдирди
Украина президенти Владимир Зеленский 3 март куни эълон қилган видеомурожаатида: “Душман бирорта стратегик йўналишда муваффақиятга эриша олмади. Улар тушкунликка тушган ва ҳалокатга маҳкумдир. Киев бу тунда навбатдаги ракета-бомба зарбаларига дош берди. Бизнинг ҳаводан мудофамиз яхши ишлади”,-деди.
У россияликларга мурожаат қилар экан: “Шундай сўзларни ўргана бошланг, булар "репарация" ва "контрибуция". Сизлар давлатга қарши ва ҳар бир украинга қарши қилган ҳаракатларингиз учун тўлиқ равишда товон тўлайсиз, биз ҳалок бўлганларни унутмаймиз”, -деб таъкидлади.
Зеленский уруш оқибатида ишсиз қолган украиналикларнинг ҳар бирига ойига 6,5 минг гривен (216 доллар) дан берилишини айтди. У, шунингдек, хориж давлатларидан 16 минг кўнгилли Россияга қарши жанг қилишга келганини билдирди
Зеленский ўз нутқини рус тилида якунлади ва қуйидагиларни айтди: "Иди домой, иди к себе домой защищать своих людей, и не по всему миру, а у себя дома, их тоже немало - около 150 миллионов. А тут – слава Украине!" (Уйингга қайт, уйингга бориб ўз одамларингни ҳимоя қил, дунё бўйлаб эмас, ўз уйингда, улар ҳам оз эмас -150 миллионга яқин. Бу ерда эса - Украинага шарафлар бўлсин!)
Киев ва Москва музокараларининг иккинчи раунди бошланиши кутилмоқда
Россия ва Украина делегациялари ўртасида Беларусда бўлиб ўтадиган музокаралар 3 март куни Москва вақти билан соат 15:00 (Тошкент вақти билан 18:00) да бошланиши кутилмоқда. Бу ҳақда Путиннинг ёрдамчиси Владимир Мединский маълум қилди. У Россия делегациясига раҳбарлик қилмоқда.
Аммо Киев расмийлари ҳозирча бу борада маълумот бермади.
Москва Украинадан Қрим Россия ҳудуди эканини, россияпараст исёнчилар назорати остида ўзларини “ДХР” ва “ЛХР” деб номлаб олган ҳудудлар мустақил давлатлар эканини тан олишни талаб қилмоқда.
Украина Россиянинг бундай ултимат талабларини бажармаслигини ва музокаралар тенг ҳуқуқли асосда ўтказилиши шартлигини билдирган.
“Газпром” назорати остидаги директорлар кенгаши “Эхо Москви”ни ёпиш қарорига келди
Директорлар кенгаши кўпчилик овоз билан “Эхо Москви” радиоси ва сайтини тугатиш ҳақида қарор қабул қилган. Бу ҳақда “Эхо Москви”нинг бош муҳаррири Алексей Венедиктов ўз Телеграм-канали орқали маълум қилди.
Россия расмийлари маҳаллий ОАВ олдига Украинадаги ҳарбий ҳаракатларни “уруш” деб атамаслик талабини қўйган. Россия нашрларидан қўшни мамлакатдаги воқеалар ҳақида фақат расмий манбалардан олинган ҳамда уларнинг лексикасида фойдаланган ҳолда хабар қилиш талаб қилинмоқда.
Бу талабни бузгани учун 1 март куни “Эхо Москви” радиостанцияси эфири узиб қўйилган, сайти эса блокланган. Шу каби чора “Дождь” телеканали, The Village нашри, DOXA талабалар журнали сайтларига нисбатан ҳам қўлланилган. “Новая газета” таҳририятининг эса нашр ҳомийларининг овоз беришидан кейин цензурага рози бўлишдан бошқа чораси қолган эмас.