Байден: АҚШ Россия учоқлари учун ўз осмонини ёпади
АҚШ Россия учоқлари учун ўз ҳаво ҳудудини ёпмоқда. Бу ҳақда президент Жо Байден Конгресснинг ҳар икки палатаси олдида йиллик мурожаат билан чиқиши чоғида билдирди.
“Биз ўз иттифоқчиларимизга қўшилиб, Америка ҳаво ҳудудини Россиядан бўлган барча рейслар учун ёпяпмиз”, дея қайд этди Байден.
Аввалроқ мазкур масала бўйича Европа Иттифоқи ва Қўшма Штатларнинг маслаҳатлашуви бўлиб ўтганди. ЕИ вакиллари америкаликларга Россиянинг Украинага бостириб кириши ортидан Европа Иттифоқи томонидан ҳаво ҳудудини ёпиш бўйича Россия учоқлари учун жорий этилган тақиқ қарори хусусида кўпроқ маълумот тақдим этишган.
Канада Путин ва россиялик қатор юқори лавозимли амалдорларга қарши санкция жорий қилди
Канада расмийлари расман Россия президенти Владимир Путин ҳамда бу мамлакатнинг бир қатор юқори лавозимли мулозимига қарши санкциялар жорий этди.
Toronto Star нашри хабарига кўра, Путиндан ташқари санкциялар Россия ташқи ишлар вазири Сергей Лавров, молия вазири Антон Силуанов, мудофаа вазири Сергей Шойгу, адлия вазири Константин Чуйченко ва президент администрацияси раҳбари Антон Вайнога қарши киритилмоқда.
Бундан ташқари, санкция рўйхатида Россия Федерацияси Хавфсизлик кенгаши раисининг муовини Дмитрий Медведев, бош вазир Михаил Мишустин, ички ишлар вазири Владимир Колокольцев, Москва мэри Сергей Собянин ва Санкт-Петербург губернатори Александр Бегловнинг номлари бор.
Байден: Путин ҳур элнинг иродасини буколмайди
АҚШ президенти Жо Байден Америка Конгресси аъзолари ҳузурида “Мамлакатдаги аҳвол ҳақида”ги йиллик мурожаат билан чиқиш қилди. Президент нутқининг асосий қисми Россиянинг Украинага қарши агрессиясига бағишланди.
Кўплаб сенаторлар ва конгрессменлар Байденнинг нутқини тинглашга Украина байроқлари ёки сариқ-мовий аксессуарлар билан келишган. Украинанинг АҚШдаги элчиси Оксана Макарова АҚШнинг биринчи хоними Жилл Байден ёнида ўтирган, Конгресс аъзолари уни олқиш билан кутиб олишган.
Байден ўз нутқини ташқи сиёсатдан бошлаган. “Путин хато қилди. У украин халқининг қаршилигига дуч келди. Дунё украинлар матонатига, президент Зеленскийнинг қатъиятига таҳсин ўқимоқда”, деган АҚШ президенти.
Байден АҚШ ва иттифоқчилари томонидан Россияга қарши жорий этилган санкцияларни санаб ўтаркан, Россия армиясини заифлаштиришга қаратилган чеклов чораларини алоҳида қайд этган. Оқ уй раҳбари АҚШ ва иттифоқчилари россиялик олигархларнинг жиноятларини текшириш ва улар ўз бойликларини қандай тўплаганини аниқлаш мақсадида махсус гуруҳ тузишга қарор қилганини айтган.
Шунингдек, Байден АҚШ ўз ҳаво ҳудудини Россия учоқлари учун ёпганини эълон қилган. Аввалроқ Буюк Британия, Канада, Европа Иттифоқи ва яна бир нечта мамлакат шундай йўл тутган эди.
Байденга кўра, АҚШ Украинани дастаклашда давом этади, бироқ ҳарбий ҳаракатларда иштирок этмайди. “Путиннинг Украинадаги уруши Россияни заифлаштириб, қолган дунёни кучайтиради. Биз Европа бирлигини, Ғарб бирлигини кўряпмиз. Бу синов даври, бу кунлар ўтиб кетиши учун вақт керак. Аммо Путин ҳур элнинг иродасини бука олмайди”, дея урғулаган Байден Украина мавзусига якун ясар экан.
Москвада полиция Украина элчихонасига гул олиб борган она-болаларни қўлга олди
Москвада полиция Екатерина Завизион ҳамда Ольга Альтерни уларнинг беш фарзанди билан бирга қўлга олди. Бу ҳақда “Фейсбук”да антрополог Александра Архипова маълум қилди.
Аёллар Украина элчихонаси олдига гул қўйишмоқчи бўлган, болалар эса (уларнинг энг каттаси 11 ёшда) ўзлари чизган “Битсин уруш” ёзувли плакатни кўтариб олишган эди.
Она-болаларни тутиб кетган полициячилар дастлаб уларнинг барчасини автозакда сақлашган, сўнгра ИИБга келтиришган ва телефонларини олиб қўйиб, эрталабгача ҳибсда сақламоқчи бўлишган. Аммо адвокат етиб келиб, ярим тундан кейин оналар билан болаларни ИИБдан олиб чиққан.
Полиция бўлимида Екатерина ва Ольгага ота-оналик ҳуқуқидан маҳрум этиш билан таҳдид қилишган. Уларга нисбатан маъмурий баённома тузилган, лекин маъмурий иш айнан қайси моддага кўра очилгани маълум эмас.