Эстония парламенти Россиядаги сиёсий режимни “террорчи режим” деб топди
Эстония парламенти Украинага бостириб кирган ва ишғол этилмиш ҳудудларни аннексия қилиб олган Россия сиёсий режимини “террористик режим” деб топди. Бунга оид резолюцияни ёқлаб парламентдаги 88 нафар депутатнинг барчаси овоз берган.
Мамлакат ҳукумат Россия томонидан Украинанинг ишғол этилган қисмида ўтказилмиш “сохта референдумлар” натижаларини ҳеч қачон тан олмаслигини билдирган.
“Ядровий қурол билан таҳдид қилаётган Путин режими Россияни Европада ҳам, бутун дунёда ҳам тинчлик учун энг катта хатарга айлантирди”, дейилган эстониялик журналистларнинг қўшма баёнотида.
Эстония ҳукумати Россияни БМТ Хавфсизлик кенгашининг доимий аъзоси мақомидан маҳрум этиш ҳамда ЕИ ва НАТО аъзолари томонидан Украинага ҳарбий ва гуманитар ёрдам ҳажмини оширишга чақирган.
Киевдаги Эрон элчихонаси олдида намойиш ўтказилди
Кеча Эроннинг Киевдаги элчихонаси олдида украиналиклар намойиш ўтказиб, Эрондан Россияга дронлар етказиб беришни тўхтатишни талаб қилди.
"Кечқурун Эрон элчихонаси ёнига йиғилдик. Дронлар Эронга тегишли. Очиғини айтиш мумкин, Эрон Россияга дрон сотиш орқали терроризмни дастакламоқда", деди намойишчилардан бири.
Украина байроқлари ва баннерларини кўтарган намойишчилар, Шевченко туманида “камикадзе” дронининг кўп қаватли уйга урилиб портлаши оқибатида ҳалок бўлганлар хотирасига шам ёқди.
Ҳужум натижасида тўрт киши, жумладан бир ҳомиладор аёл ва унинг эри ҳалок бўлган.
Украина ҳужумлар Эронда ишлаб чиқарилган “камикадзе дронлар” ёрдамида амалга оширилганини, дронлар нишонга урилиб, портлаганини даъво қилди.
АҚШ, Буюк Британия ва Франция Эроннинг Россияга учувчисиз қурилмалар етказиб бериши БМТ Хавфсизлик Кенгашининг 2015 йилда Эрон ва олти давлат ўртасида имзоланган ядровий келишувни бузиш эканлигини урғулаган.
Эрон Россияга дрон бераётганини яна рад қилди
Эрон Россияга Украинада фойдаланиш учун дронлар етказиб берганини яна бир бор рад этди.
"Сиёсий мақсадларга йўғрилган, асосан Ғарб оммавий ахборот воситалари томонидан ишлаб чиқилган янгиликлар тарқалаётгани афсусланарли. Эрон Ислом Республикаси Россия ва Украина ўртасидаги можаронинг ҳеч бир томонида эмас. Эрон урушаётган томонларнинг ҳеч бирига қурол-ярог сотмаган”, деди Эрон ташқи ишлар вазирлиги матбуот котиби Носир Канани.
Украина томони Эронни Россиянинг ҳарбий жиноятларига шерикликда расман айблаб чиқди.
Россия яна Украина энергетика объектларини нишонга олди
Россия бугун яна Украина энергетика обьектларини нишонга олди. Оқибатда Киев шимолидаги иссиқлик электр станцияси жойлашган ҳудудда бир қанча портлашлар содир бўлган.
Украина президенти девони раҳбари ўринбосари Кирил Тимошенконинг айтишича, Россия энэргетика иншоотига учта зарба йўллаган.
Шаҳар мери Виталий Кличко Киев шимолидаги “муҳим инфратузилма”обьектига қилинган ҳужумни тасдиқлади.
Ҳозирча Украина томони обьектга етказилган зарар миқдори ва қурбонлар ҳақида маълумот бермади.