АҚШнинг Украинадаги элчиси: Путиннинг сафарбарлиги Россиянинг заифлигидан далолат
АҚШнинг Киевдаги элчиси Брижит Бринкнинг сўзларига кўра, Россия раҳбариятининг сўнгги қадамлари уларнинг нақадар оғир аҳволда эканидан далолат беради.
"Сохта референдумлар ва сафарбарлик Россиянинг заифлиги, муваффақиятсизлигидан далолатдир. Қўшма Штатлар Россиянинг Украина ҳудудларини қўшиб олиш даъволарини ҳеч қачон тан олмайди. Биз Украинани қанча вақт керак бўлса, шунча қўллаб-қувватлашда давом этамиз", - деб ёзади Бринк Твиттерда.
Британия вазири: Путиннинг ҳаракатлари - босқин барбод бўлганини тан олишдир
Буюк Британия мудофаа вазири Бен Уоллес Россияда қисман сафарбарлик эълон қилинишига изоҳ берди.
“Президент Путиннинг ўз аҳолисининг бир қисмини сафарбар қилмаслик ҳақидаги ўваъдаларини бузиши, шунингдек, Украинанинг бир қатор ҳудудларини ноқонуний қўшиб олишга уриниши, унинг босқини барбод бўлаётганини кўрсатади. У ва унинг Мудофаа вазири ўн минглаб фуқароларини қуролсиз ва ёмон қўмондонлик остида ўлимга жўнатган. Ҳеч қандай таҳдид ёки ташвиқот Украина ғалаба қозонаётганини яшира олмайди. Халқаро ҳамжамият бирлашди ва Россия халқаро майдонда яккамаҳовга айланмоқда ", деб ёзди Бен Уоллес.
Нидерландия Бош вазири: Сафарбарлик фармони - Кремлнинг ваҳимага тушгани белгиси
Путиннинг қисман сафарбарлик ҳақидаги фармони Кремлнинг ваҳима ва саросимага тушганидан далолатдир. Бу ҳақда Нидерландия Бош вазири Марк Рютте таъкидлади.
"Сафарбарлик қилиш, Донецкда референдум ўтказишга чақириқлар, буларнинг барчаси ваҳима ва саросима аломатлари. Унинг ядровий қурол ҳақидаги риторикасини биз аввал ҳам кўп эшитганмиз. Биз билган риторика. Мен хотиржам бўлишни маслаҳат берган бўлардим", деди Рютте.
"Могилизацияга йўл қўймаймиз"— "Весна" ҳаракати сафарбарликка қарши акция бошлади
“Весна” ҳаракати Россия президенти Владимир Путин эълон қилган сафарбарликка қарши аҳолини умуммиллий норозилик намойишига чиқишга чақирди.
Фаоллар фуқароларга 21 сентабрь куни соат 19: 00 да ўз шаҳарлари марказида тўпланишни таклиф қилмоқда.
"Минглаб рус эркаклари - оталаримиз, укаларимиз, эрларимиз урушнинг гўшт майдалагичига ташланади. Нима учун улар ўлиши керак?", дейилади баёнотда.
Россия президенти Владимир Путин чоршанба куни эрталаб телевидение орқали халққа мурожаат қилиб, мамлакатда қисман сафарбарлик эълон қилди.
У аллақачон фармонни имзолаган. “Мобилизация чоралари бугундан бошланади”, деди Путин.
Мудофаа вазири Сергей Шойгу, ўз навбатида, Россияда “катта сафарбарлик захираси” борлигини айтди. 300 минг заҳирага сафарбар қилинишини билдирди.