Россия ва Украина ҳарбий асирлар билан алмашди
Украина Россия асирга олган 215 аскарини қайтарди. Уларнинг кўпчилиги «Азовсталь» заводини ҳимоя қилган жангчилардир. Асирликдан қутқарилганлар орасида «Азов» полки командири Денис Прокопенко ва унинг ўринбосарлари ҳам бор.
«Азов»чилар давлатга хиёнатда айбланиб Украинада ҳибсга олинган президент Путиннинг “яқин биродари” сифатида эътироф этиладиган россияпараст “Мухолифат платформаси – Ҳаёт учун!” партияси раҳбари Виктор Медведчукка алиштирилган.
Бундан ташқари агентликлар Россияга асирликдаги 55 рус аскари қайтарилганини ёзмоқда. Улардан икки нафари катта ва олти нафари кичик унвондаги зобитлардир.
Россия ҳукумати ҳозирча асирлар билан алмашинилгани тўғрисидагиги хабарларга муносабат билдирмади ва асирлар Виктор Медведчукка алмаштирилганини тасдиқламади. Май ойида Кремль Медведчукни асирга олинган «Азов» жангчиларига алмаштириш режаси мавжуд эмаслигини билдирганди.
Зеленский: Асирлар Туркия президенти ва Саудия қироли ёрдамида озод қилинди
Украина президенти Владимир Зеленский «Азов» жангчилари асирликдан Туркия президенти Режаб Тоййиб Эрдўғон воситачилигида озод этилганини айтди. «Азов» чилар Туркияда уруш якунлангунига қадар қоладилар. Зеленскийга кўра, асирликдан озод этилишнинг асосий шарти бўлган.
Бундан ташқари Россия асирга олинган ўн нафар хориж фуқаросини ҳам озод қилди. Уларнинг айримлари ўзини ДХР деб номлаб олган тан олинмаган ҳудудда Украина томонида туриб жанг қилгани учун судланган эди. Озод қилинганлардан бир нечаси британиялик, икки нафари АҚШ фуқароси.
Хорижликларни асирликдан озод қилиниши Саудия Арабистони валиаҳд шаҳзодаси Муҳаммад бин Салмон воситачилигида амалга оширилгани айтилмоқда. Озод қилинган хорижликлар Саудияга жўнатилган. Британия бош вазири лиз Трасс бу воқеани «фавқулодда узоқ кутилган янгилик» деб атади.
Зеленский БМТга: Россия жиноятлари учун «адолатли жазо» талаб қиламиз
21 сентябрь куни Украина президент Владимир Зеленский Бирлашган Миллатлар Ташкилотининг махсус трибуналидан Россия Украинага бостириб киргани учун мамлакатни «адолатли жазолашни» талаб қилди. Хусусан, президент Россияга қарши молиявий жазо қўллашни ҳамда Москвани Хавфсизлик кенгашидаги вето ҳуқуқидан маҳрум этишга чорлади.
«Украинага қарши жиноят содир этилди ва биз адолатли жазони талаб қиламиз. Жиноят бизнинг давлат чегараларимизга қарши содир этилди. Халқимиз ҳаётига қарши содир этилди. Аёлларимиз ва эркакларимизнинг шаънига қарши содир этилди. Сиз ва мени Бирлашган Миллатлар Ташкилоти ҳамжамияти қилган қадриятларга қарши содир этилди», - деди Зеленский.
Президентнинг олдиндан ёзиб олинган мурожаати БМТ Бош Ассамблеясида дунё етакчиларига намойиш қилинди. Зеленксий мурожаатидан олдинроқ Россия президенти Владимир Путин Россияда Иккинчи жаҳон уруши йилларидан бери илк маротаба уруш давридаги сафарбарликни бошлаш ҳақида фармон имзолаганини маълум қилган эди.
Москва 300 мингга яқин аскарни сафарбар қилишни режалаштирмоқда. Россия жорий йилинг февраль ойида Украинага бостириб кирганидан бери минглаб одам нобуд бўлди, миллионлаб одам ўз уйини тарк этишга мажбур бўлди, бутун бошли шаҳарлар вайронага айланди.
Зеленский тинчлик учун муҳокама қилинмайдиган бешта шартни айтиб ўтди.
Бу шартлар орасида Россияни тажовузкорлиги учун жазолаш ва Украина хавфсизлиги ва ҳудудий яхлитлигини тиклаш шартлари бор.
БМТдаги кўплаб вакиллар Зеленский мурожаати якунида тик туриб қарсак чалишди.
Алишер Усмоновнинг санкцияга йўлиққан «Дилбар» яхтаси Гамбургдан Бремен портига олиб кетилди
22 сентябрга ўтар кечаси Усмоновлар оиласига тегишли бир неча миллион долларлик ҳашаматли яхта Гамбургдан Бремен портига олиб кетилди.
Келиб чиқиши ўзбекистонлик миллиардер Алишер Усмоновга тегишли экани айтиладиган яхта март ойидан бери Гамбургда сақланаётгани эди. Усмонов Россиянинг Украинага босқини сабабли Европа Иттифоқи санкцияларига дучор бўлган.
Германиянинг NDR телерадиокомпаниясининг хабар беришича, 156 метр узунликдаги «Дилбар» яхтаси бир кечада Гамбург портидан Бременга олиб борилган, чунки у лангар ташлаган портни бўшатиш эҳтиёжи туғилган. Расмийларга кўра, яхта Усмоновнинг синглисига тегишли бўлиб, у ҳам санкцияларга дучор бўлган.
Федерал жиноий полиция идораси яхтанинг қиймати ярим миллиард евро эканлигини маълум қилган.
Март ойида Forbes журнали Дилбар Гамбургдаги Blohm + Voss кемасозлик заводида таъмирдан ўтказилаётган пайтида Германия ҳукумати томонидан мусодара қилингани ҳақида хабар берган эди.
Чоршанба куни Германия полицияси пул ювиш гумонлари бўйича тергов доирасида Бавария жанубида Усмоновга тегишли виллада рейд ўтказгани айтилмоқда.
Хабарларга кўра, рейдлар ва яхтанинг бошқа жойга кўчирилиши ўртасида ҳеч қандай алоқа йўқ.
Forbes маълумотларига кўра, 69 ёшли Усмоновнинг бойлиги 14,6 миллиард долларни ташкил қилади.
Luerssen веб-сайтида ёзилишича, 2016 йилда қуриб битирилган «Дилбар» ялпи тоннаж бўйича дунёдаги энг катта моторли яхта ҳисобланади. Унда яхтага ўрнатилган дунёдаги энг катта ҳовуз бор.