Қўқонда газ портлаши оқибатида бир киши ўлди
Фарғонанинг Қўқон шаҳри Алишер Навоий мавзесидаги оилалардан бирида газ портлаши оқибатида бир киши ўлди, яна бири касалхонага ётқизилди.
Вилоят Фавқулодда вазиятлар бошқармаси хабарига кўра, воқеа 12 декабрь куни содир бўлган.
Расмий версияга кўра, портлаш оила аъзоларидан бирининг газни текшириб кўриш учун гугурт чаққан пайти содир бўлган. Портлаш оқибатида бир киши воқеа жойида ҳалок бўлган, яна бир киши куйиш жароҳатлари билан Қўқон шаҳар тиббиёт марказига жойлаштирилган.
Қўқон шаҳар прокуратураси ҳодиса бўйича терговга қадар текширув олиб бормоқда.
Қаршида ис газидан заҳарланиш: Бир бола ўлди, икки бола касалхонада
Қашқадарёда 13 ёшли бола ис газидан заҳарланиб вафот этган, унинг 9 ва 11 ёшли укалари шифохонага ётқизилган.
Бош прокуратуранинг матбуотга билдиришича, воқеа 11 декабрь куни Қашқадарёнинг Қарши шаҳри Пахтазор маҳалласида содир бўлган.
Расмий версияга кўра, ушбу маҳалладаги оилалардан бирида газ плитасидан чиққан ис газидан оиланинг уч фарзанди заҳарланган. Болалардан бири ўлган, икки нафари касалхонада даволанмоқда.
Ҳолат юзасидан шаҳар прокуратураси терговга қадар текширув ҳаракатларини олиб бормоқда.
Расмийлар бу каби ҳодисаларга фуқаролар томонидан газ ва муқобил ёқилғи турларидан фойдаланишда хавфсизлик чораларига риоя этмаслик, қўлбола ясалган печлардан фойдаланиш сабаб бўлаётганини айтишади.
Фавқулодда вазиятлар вазирлиги фуқароларни техника хавфсизлик чораларига амал қилиш ҳақида огоҳлантириб келади, аммо бу каби ҳолатларда фуқароларга товон тўлаш ёки моддий ёрдам кўрсатиш кўзда тутилмаган. Ўтган ҳафта содир бўлган ўлим ҳолатларидан бирида қурбонлар қарздорлик сабаб газдан узилгани ва ноқонуний улангани айтилган.
Қиш чиққунча бензин 10 центга арзон бўлди
Ҳукумат қиш пайти бензин нархини арзонлатишга қарор қилди. Президент қарорига кўра, қиш тугагунча АИ-80 бензинига акциз солиғи бекор қилинди.
Мазкур қарор натижасида ушбу бензин турининг чакана нархи 8,7 фоизга арзонлайди. Эндиликда АИ-80 бензинини 1100 сўмга арзонроқ сотиб олиш мумкин. Буни АҚШ долларида ҳисобланса, тахминан 10 цент арзонлаган бўлади.
Янги нархда бензиннинг бир литрини 5700 сўмдан сотиб олиш мумкин. Бу тартиб кейинги йилнинг 1 мартигача амалда бўлади.
Ҳукуматнинг ушбу қарори мамлакатда кузатилаётган энергетик инқирозни юмшатиш уриниши сифатида баҳоланмоқда.
Тошкентдан олинган хабарларга кўра, ҳозирда фақат “Ўзбекнефтгаз” шохобчаларида АИ-80 бензини 5700 сўмдан сотилмоқда. Бошқа АЁҚШларда эса эски нархда сотилаётидан шикоятлар бўляпти. Бунинг оқибатида эса “Ўзбекнефтгаз заправкалари"да турнақатор навбатлар пайдо бўлган.
Андижонда иситиш печидан ёнғин чиқди: Бир киши ўлди
Андижонда иситиш печидан келиб чиққан ёнғинда 63 яшар аёл воқеа жойида вафот этган, унинг 31 яшар фарзанди куйиш жароҳатлари билан касалхонага ётқизилган.
Буни тасдиқлаган ҳокимликка кўра, воқеа 12 декабрь куни Андижон вилояти, Андижон тумани, Саноат МФЙ, Саноатчи кўчасидаги 34- уйда содир бўлган.
Андижон тумани ҳокимлиги эълон қилган суратларда Абдуллаевлар хонадонининг ёнғиндан кейинги аҳволи акс этган.
Ҳокимликка кўра, уйнинг 40 м\кв қисми ёнғинда зарарланган.
Расмий версияга кўра, ёнғин иситиш печидан фойдаланишда эҳтиётсизлик оқибатида келиб чиққан.