Андижонда уч бола ёнғинда ўлди
Ўзбекистон расмийлари мамлакат энерго тизимида юзага келган инқирозни бартараф этиш учун чоралар кўраётгани ҳақида баёнотлар бераркан, газ ва электр тақчиллиги кўпроқ одамларнинг умрига зомин бўлишда давом этмоқда.
22 декабрь куни Андижон шаҳри «Далварзин» МФЙдаги хонадонда юз берган ёнғин оқибатида 3 нафар бола ҳалок бўлди.
Бу хабарни тасдиқлаган Андижон вилоят фавқулодда вазиятлар бошқармаси ёнғин сабабларини очиқламади. Бироқ тармоқларда болалар ўлими энергетик бўҳронга боғланмоқда.
Ёнғин оқибатида бир оиланинг 3 фарзанди- 5,13, 15 ёшдаги болалар қурбон бўлган.
Агар бу болалар ўлимига ҳам энергетик муаммолар сабаб бўлгани тасдиқланса, жорий йилда совуқ бошланганидан бери энергия инқирозидан қурбон бўлган болалар сони 18 нафарга етади, ўлган болаларнинг ёши 3 ойликдан 15 ёшгача.
Бухорода 4 бола
Жиззахда 4 бола
Андижон 3 бола
Қашқадарёда 2 бола
Хоразмда 2 бола
Наманганда 1 бола
Тошкент вилоятида 1 бола
Самарқандда 1 бола
Бу фақат болалар ўлимига оид тахминий рақамлар. Маҳаллий матбуотдаги маълумотлардан келиб чиқилса, сўнгги икки ойда Ўзбекистонда ис гази ва печкадан чиққан ёнғин ҳамда газ портлаши оқибатида ўлганлар жами сони 38 кишига етди.
Чироқсиз Ўзбекистон Афғонистонга электр экспортини қайта тиклади
Мамлакатда энергетик бўҳрон давом этаётган бир пайтда Ўзбекистон қўшни Афғонистонга электр экспорт қилиш бўйича янги келишув имзолади.
TOLOnews хабарига кўра, Толибон шакллантирган ҳукумат таркибидаги Энергетика ва сув захиралари вазирлиги Ўзбекистон билан Афғонистонга электр энергияси узатишга оид шартномани яна бир йилга узайтирган.
Икки ой аввал Ўзбекистонда энергетик коллапс бошлангач, Афғонистонга электр энергияси экспорти икки баравар қисқаргани хабар қилинган эди.
Янги келишувга кўра, Ўзбекистон Афғонистонга электр экспортини тўлиқ қайта тиклаган ва қиш мавсумида 450 МВт электр энергияси етказиб бериш мажбуриятини зиммасига олган.
Da Afghanistan Breshna Sherkat (DABS) миллий энергетика компанияси маълумотига кўра, Ўзбекистон Афғонистонга йилига 2,2 миллиард кВт/соат электр энергияси етказиб бериши лозим. Шартнома қиймати йилига тахминан 100 миллион долларни ташкил этиши айтилган.
Бухородаги ўқув маркази ертўласида портлаш бўлди
Бугун тунда Бухоро вилояти, Бухоро шаҳар “Олим Хўжаев” маҳалласи, Мустақиллик кўчасида жойлашган ўқув маркази ертўласида ҳам чақнаш натижасида портлаш содир бўлди.
Бухоро вилояти Фавқулодда вазиятлар бошқармасига кўра, портлаш оқибатида ертўладаги уч дона эшик ромлар жойидан силжиган ва 70 квадрат метр майдоннинг том қисмидаги пластик қоплама зарарланган.
Бинодан ташқаридаги ертўланинг бетон қопламаси зарарланган.
Бухородаги ушбу ходисада жабрланганлар ва қурбонлар бўлмагани хабар қилинди.
Қамчиқда қор кўчкиси хавфи. 2300 одам эвакуация қилинди
Фавқулодда вазиятлар вазирлиги мамлакатнинг турли худудларида қор кўчкиси хавфидан огоҳлантирди. 4 январь куни Қамчиқ довони қор кўчкиси хавфи сабабли 10 соатга ёпиб қўйилди. Йўлларда тозалаш ишлари олиб борилгач, довонда ҳаракатланиш тушга яқин қайта йўлга қўйилгани айтилди.
Вазирлик хабарига кўра, Қамчиқдаги вазиятни бартараф этиш учун эвакуация штаби тузилган ва йўлда қолиб кетган йўловчиларга махсус рейс орқали поезд қатнови йўлга қўйилган. Довонда исиниш масканлари ташкил этилган.
Вазирлик Қамчиқ довонида қолиб кетган 2300 нафардан ортиқ йўловчи эвакуация қилингани, 877 та автомобиль эса хавфсиз жойга олиб ўтилганини билдирди.
Тошкент вилояти Бўстонлиқ туманидаги Чотқол тизмасининг “Чимён” тоғларида ҳам қор кўчиши хавфи эълон қилинган.