Балиқчи заправкасидаги жанжалда бир киши жароҳатланди
5 январь куни Андижон вилояти Балиқчи туманидаги автомобилларга газ қуйиш шохобчасида содир бўлган жанжалда бир киши жароҳатланди.
Вилоят Ички ишлар бошқармасига кўра, ҳодиса Балиқчи тумани Эскимарказ МФЙ, Мукаррам кўчасида жойлашган “Фаровонлик тимсоли” МЧЖга қарашли автомобилларга газ қуйиш шохобчасида содир бўлган.
“Москвич” русумли автомашина эгаси газ қуйиш учун навбат кутиб турган пайти заправка қоровуллари икки ҳайдовчини навбатсиз ўтказиб юборганини кўриб норозилик билдирган.
Натижада жанжал келиб чиққан ва заправканинг икки қоровули “Москвич” эгасини калтаклаб, унинг оёқ ва бош қисмига ёғоч таёқ билан уриб, тан жароҳати етказишган.
Ҳодиса бўйича Жиноят кодексининг «Безорилик» моддаси билан жиноят иши қўзғатилган.
Вазирлик мультфильми танқидга учради
Ўзбекистон Энергетика вазирлиги яратган мультфилм кескин танқидларга сабаб бўлди.
«Қишдан чиқиб олиш учун ҳаммамиз биргаликда энергияни иқтисод қилайлик» деб номланган мультфильмда мамлакатда кузатилаётган энергетик бўҳронга марҳум президент Ислом Каримов айбдорлигига ишора қилинган.
Энергетика билан боғлиқ рақамлар Каримов ва Мирзиёев даврига бўлинган ҳолда берилиб, Мирзиёев президентлик курсисига келгач, энергетик ислоҳатлар бошлангани таъкидланган.
Вазирликка кўра, муаммодан чиқиш учун иккита йўл мавжуд, биринчиси, энергетикани тежаш, иккинчиси, эса газни захира қилиш.
Мультфильм сўнггида нархлар ошишига ҳам ишора қилинган.
Ижтимоий тармоқларда вазирлик буюртмаси билан яратилган ушбу мультфильм танқидларга учради. Қуйида Фейсбукдаги айрим постлардан иқтибослар келтирамиз:
- Jaloliddin Sa'dinov, Фейсбук фойдаланувчиси:
Бу роликни кўриб, ҳайратланасиз; ўз ишини эплолмаган давлат айбни халқдан қидираётгандек. Яхшиямки, халқ текинга эмас, ўз пулига ўз мулкини сотиб олиб, ишлатади. Барча хатолар 2016 йилгача бўлиб ўтган деб ҳисобласак, янги ҳукумат эски даврдан қолган хатоларни тўғирламоқда, дейиляпти. Унда эски давр бош вазири кўп функциялар, шу жумладан, ижро этувчи ҳокимиятнинг бошлиғи сифатида кўп хато қилган бўлиб чиқяптими?
- Shuhrat Rustamov, Фейсбук фойдаланувчиси:
Karimov davri tugaganiga 7 yil bo'ldi. Sal uyallaring endi o'zini oqlash uchun Sovet davri yoki Karimovni malomat qilishni. Qiyudagi savollarga avval javob berlaring:
1. Nimaga oxirgi yillarda, iste'mol oshishiga qaramasdan gaz ishlab chiqarish qisqarib borgan?
2. Nimaga adolatsiz Lukoil bilan bo'lgan shartnoma qayta ko'rib chiqilmadi?
3. Nimaga energetika sohasiga doir hamma ma'lumotlar haligacha ochiqlanmagan? Statiskita yopiq aksar ko'rsatkichlar bo'yicha.
4. Nimaga hukumat yopiq qarorlar bilan bu sohani boshqarishda davom etyapti?
- Muhammad Matjon, журналист (Фейсбукдаги постидан)
Ўтган олти йилда Шоввозсойлар, ситилар қурилганда нега газ сақлаш омбори, электр станциялар қурилмади? Бундан кейин бўлишига қандай кафолатлар бор? Энди халқни кўникишга ўргатиш психологияси ишга тушди. Қойил.
Ўзгарувчан қарор: Талабаларнинг узайтирилган таътили бекор бўлди
Ўтган ҳафта совуқ сабаб олийгоҳларда қишки таътил бир ҳафтага узайтирилиб, ўқиш 9 январдан 18 январга кўчирилган эди. Бугун ҳукумат кутилмаганда бу қарорини ўзгартириб, талабаларни 11 январдан олийгоҳларга чақирди.
Вазирлар Маҳкамасининг тегишли баёни билан олийгоҳлар, техникум, коллеж, касб- ҳунар мактаблари ва академик лицейларда ўқув жараёнини ҳафтанинг ўртаси бўлишига қарамасдан чоршанбадан бошлаш ҳақида топширилди.
Тармоқларда ҳукуматнинг бу қарори норозиликларга сабаб бўлмоқда.
"Ўзбекистон, унинг халқи, мустақиллиги, келажаги учун энг катта ва жиддий хавф аномал совуқ ё иссиқ эмас, балки ҳеч ким ва ҳеч нарсадан қўрқмайдиган аномал ўзбек чиновниклари ҳамда улар қабул қиладиган аномал қарорлардир", дея ёзди журналист ва блогер Муҳрим Аъзамхўжаев.
Йўлларда музламалар бўлиб, машина ва автобусда юриш хавфли бўлаётган, авиарейслар бекор қилинаётган бир пайтда талабаларнинг ўқишга чақирилиши ота-оналарни хавотирга солмоқда.
Расмий хабарда талабаларни бу каби шошилинч чақириш сабабларига ойдинлик киритилмаган.
Телеграмдаги “Platforma” канали буни “тез ўзгарувчан қарор” деб атар экан, таътил узайтирилгач, авиа ва темир йўл чипталарини алмаштирган талабалар энди мушкул аҳволда қолишига эътибор қаратди.
Гидромет: Аномал совуқ бир ҳафта давом этади
9 январдан бошланган аномал совуқ мамлакатдаги энергетик муаммолар кўламини янада кенгайтиришидан хавотирлар бор.
Гидромет хизмати хабарига кўра, Волгабўйи ҳудудларидан кириб келган аномал совуқ Ўзбекистонда бир ҳафта давом этади. Мамлакат шимолида 30 даражагача совуқ бўлиши мумкин.
Гидрометга кўра, Ўзбекистонда ҳозирда кузатилаётган аномал совуқ ҳарорат бундан 15 йил аввал- 2008 йилнинг январь ойида кузатилган.