Яна газ портлади. Сурхондарёда икки киши, Сирдарёда ҳам икки киши ҳалок бўлди
Ўзбекистон расмийлари мамлакат энерго тизимида юзага келган инқирозни бартараф этиш учун чоралар кўраётгани ҳақида баёнотлар бераркан, газ ва электр тақчиллиги кўпроқ одамларнинг умрига зомин бўлишда давом этмоқда.
Бугун Сурхондарёда қозонхона портлаши оқибатида икки киши ҳалок бўлди, яна бир киши жароҳатланди.
Вилоят ҳокимлиги матбуот хизмати хабарига кўра, ҳодиса Термиз давлат университети академик лицейи биносида содир бўлган. Ҳодисага ташқи қувурларнинг музлаб қолиши сабаб бўлган. Бунинг оқибатида қозонхонада ички босим юқори даражада ортиб кетган ва портлаш содир бўлган.
Кеча эса Сирдарёда икки қаватли уйда газ портлади, икки киши ҳалок бўлди, бир киши жароҳатланди. Сирдарё вилоят Фавқулодда вазиятлар бошқармаси хабарига кўра, воқеа 15 январь куни Ховос тумани “Қаҳрамон” МФЙда содир бўлган.
Иккала ҳодиса юзасидан ҳам суриштирув ишлари олиб борилмоқда.
Бухорода тўрт газчи қамалди
Бухорода табиий газни талон-торож қилганлик айби билан тўрт шахс қамоққа олинди.
Бош прокуратура хабарига кўра, Бухородаги 3 та метан газ қуйиш шохобчасида жами 26,2 миллард сўмлик табиий газ яширин равишда талон-торож қилингани аниқланган.
Ҳибсга олинганлар орасида “Ҳудудгаз Бухоро” газ таъминоти корхонаси амалдорлари ҳамда иккита МЧЖ мулозимлари бор.
“Ҳудудгаз Бухоро” амалдорларига нисбатан Жиноят кодексининг 205-моддаси ва 207-моддаси билан жиноят иши қўзғатилган.
Тергов ҳаракатлари Бухоро вилоят прокуратураси томонидан ўтказилмоқда.