Полша президенти Украинанинг Қримни қайтариб олишига шубҳа билдиргани учун танқидга учради
Полша президенти Киевнинг Россия томонидан босиб олинган Қрим устидан назоратни қайта тиклай олишига ишончи комил эмаслигини айтгани учун қаттиқ танқидларга учради. Шундан сўнг, у Украинани доим қўллаб-қувватлашини маълум қилди.
Полша Россия Украинага бостириб кирганидан буён Киевнинг доимий тарафдорларидан бири бўлиб келади ва Москванинг кейинги тажовузларини олдини олиш учун Украина ўз ҳудуди устидан назоратни қайтариб олиши керак деган позицияни билдирган.
Полша президенти Анжей Дуда икки кун олдин берган интервьюсида бу позицияни яна бир бор такрорлади.
Украина ҳақиқатан ҳам Қримни қайтариб олишига ишонасизми, деган саволга Анжей Дуда бу саволга жавоб бериш қийинлигини айтди:
«Бу саволга жавоб бериш мен учун қийин. Мен учун қийин. Украина Қримни қайтариб оладими йўқ, билмайман. Лекин мен Украина Донетск ва Луганскни қайтариб олишига ишонаман. Қрим бошқа масала. Бу тарихий сабабларга кўра ҳам алоҳида аҳамиятга эга. Тарихга назар ташласак, Қрим узоқ вақт Россия таркибида бўлган».
Полша етакчисининг бу гаплари Полшадаги ҳукмрон коалиция депутатлари томонидан кескин танқид остига олинди.
«Жаноб Дудага эслатиб ўтмоқчиманки, бизнинг мамлакатимизда ҳам Полшадан кўра узоқроқ вақт бошқа давлатга тегишли бўлган шаҳарларимиз бор», деб ёзди ҳукмрон партия депутати Роман Гиертих ўзининг фейсбук тармоғидаги саҳифасида.
Украинанинг Полшадаги элчиси Васил Зварич ҳам фейсбукда «Қрим - Украинаники, шундай бўлган ва шундай бўлиб қолади» дея пост қолдирди.
Украина разведкаси Энгелсда Россия учувчисига суиқасд қилганини маълум қилди
Украина Разведка бош бошқармаси (РББ) Энгелс шаҳрида Ту-95 бомбаловчи учоғи пилоти Олег Стегачёвга суиқасд қилганини билдирди.
Украина разведкаси хабарномасига кўра, у Украина фуқаровий объектларига ракета зарбалари йўллашда ва украин фуқароларини ўлдиришда бевосита иштирок этган.
Айтилишича, Стегачёв ўқотар қуролдан ярадор қилинган. Унинг тирик ёки ўликлиги ҳозирча мавҳум.
РББ маълумотига кўра, Стегачёв 1983 йил 23 июнда туғилган ва “Энгелс” авиазабасида (06987 ҳ/қ) хизмат қилган.
Учувчи “Миротворец” базасига киритилган. 2023 йилнинг кузида Molfar OSINT-лойиҳаси Стегачёвни Украина фуқаровий объектларига Х-101/Х-555/Х-55 ракеталари билан ҳужум қилувчи Ту-95МС “Воркута” бомбаловчи учоғи пилотларидан бири сифатида тилга олган эди.
Иккинчи феврал оқшомида Энгелсда яшовчилар Петровская кўчасида ўқ узилганини ва бир киши яраланганини маълум қилишган эди.
Учинчи феврал куни бу ҳақда “Саратов 24” телеканали хабар қилди. Интернетга сиздирилган маълумотларга кўра, Стегачёв Энгелс шаҳрининг Петровская кўчасидаги уйлардан бирида рўйхатда турган.
Украина РББ келтирган туғилиш санаси ҳам бир хил. Бундан ташқари, украин разведкаси қора рангли Toyota Land Cruiser автомобили суратини ҳам эълон қилди, бу машина 2023 йилги маълумотларда Стегачёв тегишли деб қайд этилган.
Москвада рус ҳарбийларининг оилалари уюштирган норозилик намойишини ёритган журналистлар ҳибсга олинди
Рус аскарларининг оилалари ўз эрларини Украинадан қайтаришни талаб қилиб Москва марказида митинг уюштирди. Намойишда полиция 20 га яқин журналистни бир неча соатга ҳибсга олган.
"Бизнинг эркаклар на маънан, на жисмонан ҳарбий сафарбарликка тайёр эмас эди. Улар ҳарбий мутахассислар эмас, балки фуқаролик ишида ишлашган. Эрларимизни уйга қайтариш кераклигини талаб қиляпмиз”, деди норозилик акцияси иштирокчиси Мария Андреева.
Россия полицияси журналистларни бир неча соат ушлаб туриб кейин ҳеч қўйиб юборган.
"Мен ҳалок бўлган аскарлар хотирасига гул олиб келмоқчи эдим. Сафарбар қилинганлар уйга қайтишини хоҳлайман. Биз кўп болали оиламиз, эрим Украинада фронтда. У бизга керак", деди норозилик акцияси иштирокчиси Олга.
Рус аёллари Владимир Путиннинг 2022 йил сентябрдаги фармонидан кейин сафарбар қилинган эрлари, ўғиллари ва яқинларининг фронтдан қайтишини талаб қилмоқда.
Москва прокуратураси митинг рухсатсиз ўтказилганини маълум қилиб, рухсат этилмаган оммавий тадбирларга тарғиб қилиш ва иштирок этиш жавобгарликка сабаб бўлиши ҳақида огоҳлантирди.
Россия Херсон шаҳрини бомбардимон қилди
Херсон вилояти раҳбари Александр Прокудин Россия Украинанинг Херсон шаҳрига ракета зарбаси бергани, ҳужум оқибатида икки киши яралангани ва бир қанча биноларга зарар етгани ҳақида маълум қилди.
73 ёшли аёл ва 17 ёшли ўсмир яраланиб шифохонага ётқизилган.
Рейтерс видеодаги жойлашувни тасдиқлашга муваффақ бўлди, бироқ видео санасини мустақил равишда тасдиқлай олмади.
Россия Мудофаа вазирлиги ўтган ҳафта мобайнида рус қўшинлари Украина қўмондонлик марказлари, ҳарбий объектларига ҳамда ўқ дори ва ёқилғи базаларига 37 марта дрон ва бошқа қуроллар билан зарба берганини маълум қилди. Мудофаа вазирлигига кўра, рус ҳарбийлари Ғарбда ишлаб чиқарилган ҳаво ҳужумидан мудофаа тизимларини ҳам йўқ қилган.
Украина Қуролли кучлари Бош штаби сўнгги сутка ичида фронтда 45 та жанг бўлиб ўтганини маълум қилди.
Бош штаб ҳисоботига кўра, Украина ҳарбий-ҳаво кучлари, ракета ва артиллерия бўлинмалари рус ҳарбийлари ва қурол-яроғлари жойлашган ўндан ортиқ позицияларга ҳужум қилиб, битта рус артиллериясини йўқ қилган.