Ғазода 100 мингдан ортиқ аҳоли жанубга кўчган

Исроил армияси бош ҳарбий матбуот котиби контр-адмирал Даниел Ҳагарийнинг айтишича, сўнгги икки кун ичида Ғазо секторининг 100 000 дан ортиқ аҳолиси Исроил кучлари “Ғазо шаҳрида” амалиёт ўтказаётгани сабабли жанубга кўчган.

Жаноб Ҳагарий Ғазо секторида гаровга олинганларни озод қилиш бўйича саъй-ҳаракатлар олиб борилаётганини, бироқ бундай ҳаракатлар вақт талаб қилишини айтди.

"Ғазода яшовчи аҳолининг кўчирилиши уюштирилган тарзда бўлмоқда, 100 000 дан ортиқ одам жанубга кўчиб ўтди. Охирги икки кунда. Бу бизга террорчиларга қарши самарали курашиш имконини беради.”, - деди Исроил расмийси.

Фаластин томонига кўра, Исроил кучлари жума куни бир нечта касалхонани ҳужумга тутган. Исроил эса касалхоналар остига Ҳамас қўмондонлик марказлари яширинганини билдирган.

Ғазода тўртта шифохона атрофида жанглар давом этмоқда

Ал-Шифа касалхонасида бошпана олган ғазоликлар жума кунги ҳужум ортидан кўрпа-тўшагини кўтариб жанубга йўл олмоқда.

“Мен Ал-Шифа касалхонасида эдим. Энг хавфсиз жой шу касалхона бўлса керак деб ўйлагандим. Мени назаримда Ғазода хавфсиз жойни ўзи қолмади. Қаерга борамиз? Қаердан бошпана топишни ҳам билмаймиз”, - дейди ғазоликлардан бири.

Айни пайтда Ғазодаги камида тўртта шифохона атрофида жанглар давом этмоқда. Ғазо шаҳрида жойлашган Ал-Қудс шифохонаси ҳам ўраб олинган.

Исроил яна Ғазо шимолини жануб билан боғловчи асосий йўлни кун давомида бир неча соат очаётганини ва бу шимолдаги, жумладан, Ал-Шифо касалхонасидаги одамларнинг эвакуация қилишга имкон беришини айтган.

Фаластин расмийларининг айтишича, Исроил тиббиёт мажмуаларини ҳужумга тутган.

Тармоқда тарқалган видеоларда касалхоналар атрофида бир қанча ўлик ва ярадорлар, улар орасида болалар ҳам борлиги кўринади.

Фаластин расмийларига кўра, бир неча бошқа касалхоналар, жумладан, Индонезия касалхонаси ва Ғазо шимолидаги Рантисси болалар ва саратон касалхонасида ҳам портлашлар бўлган.

Исроил лекин тинч аҳолини нишонга олмаслигини ва уларга зарба бермаслик учун бор кучини сарфлаётганини такрорлади.

Исроил томонига кўра, Ҳамас жангарилари Ал Шифа ва бошқа шифохоналар остида қўмондонлик марказлари ва туннелларни яширган.

Тинч аҳолидан эса Хамас қалқон сифатида фойдланмоқда. Аммо, Ҳамас буни рад этади.

Фаластин расмийларининг айтишича, ҳаво ва артиллерия ҳужумларида Ғазода 11 мингдан ортиқ одам ҳалок бўлган. Уларнинг қарийб 40 фоизини болалар ташкил этади.

Ёрдам ташкилотлари эса Ғазодаги "аянчли" аҳволдан хавотирда.

Озиқ-овқат ва сув тугаяпти, беморларга тиббий восталар етишмаяпти.

Исроилнинг билдиришича, 7 октабр куни ХАМАС ҳужумига сабаб бўлган рейдда 1400 киши ҳалок бўлган, 240 га яқин одам эса тинч аҳоли эди.

Ғазо Соғлиқни сақлаш вазирлигининг маълум қилишича, Ғазодаги 35 касалхонанинг қарийб ярми ҳужумга тутилган зарар ёки ёқилғи етишмаслиги сабабли ишламаяпти.

Украиналик аёл: Ғазода қолгим йўқ, уруш туфайли Украинага ҳам боргим йўқ

Украиналик Татяна Тапалова 9 ойлик чақалоғини қўлида кўтариб, 20 йилдан ортиқ вақтдан бери ўзи ватан деб ҳисоблайдиган Ғазонинг Рафаҳ чегара постида урушдан қутулиш имкониятини сабр билан кутмоқда.

Тапалова фаластинлик эрининг исми анклавни тарк этиши мумкин бўлганлар рўйхатида йўқлигини билгач, умидлари пучга чиқди.

"Бу менинг эрим, турмуш қурганимизга 23 йил бўлди, беш фарзандимиз бор, қандай қилиб у рўйхатда йўқ, ҳайронман? Бу оила. Нега улар бизнинг оиламизни ажратиши керак?”, дейди Татяна.

Миср хавфсизлик ва тиббий манбалари маълум қилишича, Ғазо секторидан чет эл паспорти эгалари ва даволанишга муҳтож фаластинликларни Рафаҳ ўтиш жойи орқали Мисрга эвакуация қилиш бир кунлик узилишдан сўнг пайшанба куни қайта тикланди.

Аммо Тапалованинг туғилиб ўсган ватани Украинага қайтиш нияти йўқ.

"Мен бир урушдан иккинчисига ўтишни хоҳламайман. Учинчи мамлакатга боришни хоҳлайман. Ғазода қолгим йўқ, уруш туфайли Украинага ҳам боргим йўқ", дейди Татяна.

1 ноябр куни Ғазодан Рафаҳ орқали эвакуация бошланган, 7000 га яқин хорижий паспорт эгалари, икки фуқаролик ва уларнинг қарамоғида бўлганлар, шунингдек, шошилинч тиббий ёрдамга муҳтожлар Мисрга олиб ўтилди.

Рафаҳ, шунингдек, Ғазога гуманитар ёрдам юбориладиган ягона кириш нуқтасидир. Бирлашган Миллатлар Ташкилоти маълумотларига кўра, чоршанба куни озиқ-овқат дори-дармонлари ва сув ортилган 106 юк машинаси Ғазога кириб борган. 21 октябрдан бери ёрдам юк машиналарининг умумий сони 756 тага етган.

Канада полицияси яҳудий мактабларидаги отишмаларни тафтиш қилмоқда

Канада полицияси чоршанбага ўтар кечаси Монреал шаҳридаги иккита яҳудий мактабида рўй берган отишмани тергов қилмоқда.

Ижтимоий тармоқларда пайшанба куни Трюдо мактабларда содир бўлган воқеаларни "антисемитиз" сифатида қоралади ва канадаликларни бирдам бўлишга чақирди.

Маҳаллий оммавий ахборот воситаларининг хабар беришича, иккала мактаб ҳам ходимлари пайшанба куни эрталаб келганларида, олд эшикларида ўқ тешигини кўришган.

Жароҳатланганлар йўқ ва ҳодисаларнинг бир-бирига боғлиқлиги аниқ эмас.

Монреал полицияси ибодатхоналар ва бошқа муҳим жойларда хавфсизлик чораларини кучайтиради.

Торонтода полиция яҳудийлар ва мусулмонлар ўртасида нафрат жиноятлари 7 октабр куни Исроилда Хамаснинг дастлабки ҳужумидан сўнг бир ой ичида икки баравардан кўпроққа ошганини хабар қилди.

Чоршанба оқшомида, отишмалардан бир неча соат олдин, Монреалдаги Конкордия университетида Исроил ва Ғазодаги можаронинг қарама-қарши томонлари ўртасида зўравон жанжал келиб чиққанди.