Исроил Ал-Шифа касалхонасида Ҳамасга қарши “аниқ ва мақсадли” операция ўтказаётганини айтмоқда
Исроил армияси 15 ноябр, чоршанба куни Ғазодаги Ал-Шифа касалхонасида Ҳамасга қарши “аниқ ва мақсадли” операция ўтказаётганини маълум қилди.
Армия матбуот воизи бир неча ҳафталик жанглар давомида беморлар, кўчирилганлар ва тиббиёт ходимлари қамалиб қолган Ал-Шифага уюштирилган рейдлар бошида бир неча Ҳамас жангариси йўқ қилинганини айтди.
"Разведка маълумотларига асосланиб, Исроил кучлари Шифа касалхонасининг белгиланган ҳудудида Ҳамасга қарши аниқ ва мақсадли операция ўтказмоқда. Касалхонани жонли қалқон сифатида суиистеъмол қилишни тўхтатиш учун етарлича вақт бердик. Исроил шунингдек касалхонани кенг миқёсда эвакуация қилишга ёрдам беряпти, йўлак очилган ва касалхона раҳбарияти билан мунтазам мулоқот олиб боряпти”, - деди Исроил армияси матбуот воизи Даниел Ҳагари.
Халқаро инсонпарварлик ташкилотлари Исроилнинг “Ал- Шифа” касалхонасига рейдларидан жунбушга келган.
БМТ бош котиби Антонио Гутеррешнинг инсонпарварлик масалалари бўйича муовини Ғазодаги бир нечта касалхоналардаги даҳшатли вазият ва кўп сонли ўлимлардан хавотирга тушганини таъкидлади.
“Ғазодаги Ал-Шифа касалхонасига ҳарбий рейдлар уюштирилгани ҳақидаги хабарлардан даҳшатга тушдим. Янги туғилган чақалоқлар, беморлар, тиббиёт ходимлари ва барча фуқароларнинг ҳимояси ҳамма нарсадан устун бўлиши керак. Касалхоналар жанг майдони эмас”, - деди БМТ Бош котибининг гуманитар масалалар бўйича муовини Мартин Гриффиц.
Жаҳон соғлиқни сақлаш ташкилоти “Ал- Шифа” касалхонаси “қабристонга айланиши”дан хавотир билдирган.
Исроил армияси Ғазодаги Аш Шифа касалхонаси ҳудудини эгаллади
Исроил армияси Аш Шифа касалхонаси ҳудудини эгаллагани ва бу ерда ҲАМАС радикал гуруҳига қарши “мўлжалли амалиёт”ни бошлаганини билдирди. ҲАМАС АҚШ ва ЕИ томонидан террорчи ташкилот қаторида тан олинган.
ЦАХАЛ Х ижтимоий тармоғида амалиёт ҲАМАС тирик қалқон сифатида қўллаётган тинч аҳолига зарар етказмаслик учун тиббиёт ходимлари ва араб тилини биладиган шахслардан иборат гуруҳ иштирокида олиб борилаётганини хабар қилди.
Воқеа жойида бўлган Al Jazeera мухбири касалхона ҳудудига Исроил танклари кириганини, ЦАХАЛ аскарлари эса бино ичида амалиёт ўтказаётгани ҳақида маълумот берди.
Ҳозирча касалхонада отишма ёки тўқнашув бўлгани тўғрисида хабарлар йўқ.
Исроил ҳукумати мазкур касалхона ҳудудида экстремистларнинг ер ости штаби жойлашганини иддао қилаётир. ҲАМАС эса буни рад этмоқда ва касалхонадаги 650 бемор, камида 5 минг қочқин Исроил снайперлари ва дронлари ҳужумларининг «тузоғига тушиб қолган»ини айтмоқда.
Ғазодаги энг йирик касалхоналардан бири бўлган Аш Шифада қанча киши борлиги тўғрисида аниқ маълумот мавжуд эмас.
Исроил аскарлари Ғазода ҲАМАС назоратидаги ҳукумат биноларини эгаллади
Исроил армияси Ғазода парламент, ҳукумат ва полиция биноларини эгаллади. Улар шу кунгача ҲАМАС назорати остида эди. ҲАМАС Қўшма Штатлар ва Европа Иттифоқида террорчи ташкилотлар рўйхатига киритилган.
ЦАХАЛ ҲАМАС учун «қурол ишлаб чиқариш» институти сифатида хизмат қилган инженерлик факультети ҳам эгалланганини билдирди.
Исроил армияси Ғазода ҲАМАСга қарши ҳарбий амалиётни кучайтирмоқда. ЦАХАЛ, жумладан, Ғазодаги энг йирик тиббий марказ бўлган Аш Шифа касалхонасини ҳам қуршовга олган. Исроил ҳукумати мазкур касалхона ҳудудида экстремистларнинг ер ости штаби жойлашганини иддао қилаётир. ҲАМАС эса буни рад этмоқда ва касалхонадаги 650 бемор, камида 5 минг қочқин Исроил снайперлари ва дронлари ҳужумларининг «тузоғига тушиб қолган»ини айтмоқда.
Reuters агентлиги 14 ноябрда фаластинликлар Аш Шифа касалхонаси ҳудудида Исроил қуршови пайтида ваофт этган беморларни дафн этиш учун биродарлик қабри қазигани ҳақида ёзди.
Жаҳон Соғлиқни сақлаш ташкилотининг билдиришича, Ғазодаги 36 та тиббиёт ташкилотининг 22 таси ишламаяпти. Қолган 14 та касалхонада эса дори-дармон ва жарроҳлик операциялари учун керакли воситалар етишмаяпти.
БМТ бош котиби Антониу Гутерриш гуманитар мақсадларда томонларни ўт отишни тўхтатишга чақирди.
БМТ агентлиги Ўзбекистон ҳукуматига гуманитар ёрдам учун миннатдорчилик билдирди
БМТнинг Фаластинлик қочқинлар бўйича агентлиги гуманитар миссиясига ёрдам бериш учун 1,5 миллион доллар ажратгани учун Ўзбекистон ҳукуматига миннатдорчилик билдирди. Агентликнинг 13 ноябрда маълум қилишича, Ўзбекистон бу маблағни 2 ноябрда тақдим этган.
«Ғазода 7 октябрда бошланган ҳарбий ҳаракатлар оқибатида шу кунгача 11 мингдан кўпроқ киши ҳалок бўлди, улардан 70 фоизи аёллар, болалар ва кексалардир. Ўрта ҳисобда ҳар ўн дақиқада бир бола ҳалок бўлмоқда, икки бола яраланмоқда. Деярли 1, 5 миллион киши Ғазонинг турли ҳудудларига чиқиб кетди ва уларнинг деярли ярми Фаластинлик қочқинлар бўйича агентликнинг 154 объектида жон сақламоқда. Рафақ чегара назорат пункти орқали Ғазога 980 та юк машинасида гуманитар ёрдам олиб кирилди. Бу Ғазо бўлгасида тузоққа тушиб қолган икки миллиондан кўпроқ кишининг эҳтиёжлари олдида денгиздан бир томчи», - дейилади агентлик баёнотида.
31 октябрь куни ўтган ҳукумат мажлисида Мирзиёев Ўзбекистон Фаластин халқига ва унинг мустақилликка бўлган ҳуқуқига “кучли хайрихоҳ” эканини ва БМТнинг ҳудуддаги гуманитар миссиясига ёрдам бериш учун 1,5 миллион доллар ажратилишини билдирганди.
У Ҳамас ва Исроил ўртасида уруш бошлангандан буён “бегуноҳ ва тинч аҳоли орасида қурбонлар бўлаётгани”ни таъкидлаганди. ҲАМАС АҚШ ва Европа Иттифоқи томонидан террорчи ташкилот деб тан олинган.