Россиялик мухолифатчи ва коррупцияга қарши ўтказилган кўп минг кишилик митингларнинг ташкилотчиси Алексей Навальний президент Владимир Путин матбуот котиби Дмитрий Песковнинг ўғли Николай Чоулз ишсиз бўла туриб шохона ҳаёт кечираётганини айтиб чиқди.
-Замонавий Россияда қоидалар тамомила бошқа. Омад сизга эмас, Тесла автомобилининг эгаси бўлган мана бундай одамларга кулиб боқади. Келинг, у билан танишайлик. Бу Николай Чоулз. Бу хорижликнинг Песковга қандай алоқаси бор десангиз, билингки, Николай Дмитрий Песковнинг ўғлидир, -деди Навальний.
Унга кўра, Песковнинг ишсиз ўғли қимматбаҳо автомобилларга тўла бўлган гаражга, Москвада иккита квартирага эга. Навальний Песковнинг ўғли шахсий самолётларда ва яхталарда саёҳат қилишини билдирди.
Навальнийга кўра, Чоулз Песковнинг биринчи оиласидан бўлган ўғлидир. У1990 йиллар бошида онаси билан Британияга кўчиб кетган ва у ерда ўгай отасининг фамилиясини олган. 6 йил олдин эса у Россияга қайтган.
Навальний ўз баёнотида тилга олган Тесла автомобилининг нархи 150 минг долларни ташкил қилади.