Farg‘ona viloyat hokimi Shuhrat G‘anievning ovozi deb iddao qilinayotgan audioyozuvda ovoz egasi viloyat Majburiy ijro byurosi va Soliq idorasi boshliqlariga ularning “ichagini sug‘urib, boshiga salla qilish”, bilan tahdid qiladi.
Audio may oyida yozilganini ovoz egasi gaplari mazmunidan anglash mumkin.
Ovozli yozuvni Ozodlikka jo‘natgan farg‘onalik tadbirkorning aytishicha¸ bu audioni uning o‘zi 22 may kuni viloyat hokimligida bo‘lib o‘tgan majlisda yozib olgan. Audioni yozib olgan farg‘onalikning iddao qilishicha, MIB va Soliq boshqarmalari boshliqlarini haqorat qilayotgan amaldor – Farg‘ona viloyat hokimi Shuhrat G‘anievdir.
Ozodlikka Shuhrat G‘anievning ovozi deb iddao qilinayotgan audio yuzasidan Farg‘ona viloyat hokimligi matbuot xizmati izoh bermadi.
Ozodlik tahririyatiga 24 may kuni kelib tushgan va Farg‘ona viloyat hokimi Shuhrat G‘anievning ovozi deb iddao qilinayotgan audioda ovoz egasi viloyat Majburiy ijro byurosi va Soliq boshqarmasi boshliqlarini “sotqin”, “dorning ostidan qochgan marazlar”, deb ataydi, ularga “ichagingni sug‘urib olaman”, "qamataman" deb do‘q-pupisa qiladi.
Браузерингиз HTML5 ни қўллаб- қувватламайди
Farg‘ona hokimi Shuhrat G‘anievning ovozi ekani ishonilayotgan audio
“Umring 5 yil, 10 yil qamoqda o‘tadi. Sen MIBni boshlig‘i bo‘lasanmi, boshqa bo‘lasanmi, undan nari bo‘lasanmi, sen nomardlarni qamattiraman. Men o‘zimni zo‘rg‘a bosib turibman, ichagingni olib, boshingdan salla qilib qo‘yish qo‘limdan keladi”, - deydi ovoz egasi Ozodlikka sizdirilgan audioda.
Shuningdek, Farg‘ona viloyati hokimi, deya iddao qilinayotgan shaxs viloyat MIB va Soliq boshqarmasi boshliqlarini Toshkentdan ekanini pesh qilib, Farg‘onani botqoqqa botirayotganlikda ayblaydi:
“Sen nomardlar, soliqni boshlig‘i - Toshkent shahar fuqarosi, MIBni boshlig‘i - Toshkent shahar fuqarosi. Farg‘onaga lavozimga tayinlanib, farg‘onaliklarni botqoqqa botiryapti, deb men senlarni muhokama qilaman. Imkoniyat topilsa men senlarni ichak-chavog‘ingni sug‘urib olaman. Lekin aytib qo‘yishim kerak, qamataman ikkalovinglarni. Soliqni boshlig‘i ham, MIBni boshlig‘i ham ikkaloving javobgar bo‘lasan. Mana shu may oyida bajaraylik, bajarilmasa ikkaloving javobgar bo‘lasan, jinoiy javobgarlikka torttiraman. Menga unaqa sotqinlar kerak emas. Bular sotqin bular. Bular kulyapti bizni farg‘onaliklar ustidan. Kulyapti bular. Nomard bo‘lmasa 3 milliard 700dan 229 million pul undiradimi. Butun dorni tagidan qochgan marazlar yig‘ilgan”, - deydi Farg‘ona viloyati hokimi ekani ishonilayotgan ovoz egasi.
Farg‘ona viloyati hokimi MIB va soliq boshqarmalari boshliqlarini nega tanqid qilgani ma’lum emas.
Ammo, ikki yarim minutlik audiodan har ikki idora rejani bajarmagani hokimning g‘azabini keltirgan bo‘lishini taxmin qilish mumkin.
Ozodlik Shuhrat G‘anievning ovozi deb ishonilayotgan audio yuzasidan Farg‘ona viloyati hokimligi matbuot kotibi Gulbahor G‘anievadan izoh so‘radi.
G‘anieva audioni jo‘natishni, eshitib ko‘rib izoh berishini aytdi. Ozodlik audioni unga Telegram orqali jo‘natdi.
Lekin, 27 may kunning ohiriga qadar Gulbahor G‘anievadan javob bo‘lmadi. MIB va Soliq idorasining haqorat eshitgan boshliqlaridan ham izoh olishning imkoni bo‘lmadi.
- Farg‘ona hokimi Shuhrat G‘anievning haqoratli ovozi oldin ham Internetga sizdirilgan.
- O‘tgan yili yanvar oyida hokim G‘aniev Aqto‘be fojiasida 16 nafar farzandidan ayrilgan Toshloq tumani ahlini "haromilar" va "padaringga la’nat" deya haqoratlagandi.
-
Браузерингиз HTML5 ни қўллаб- қувватламайди
Farg‘ona hokimi toshloqliklarga Hajga borishga taqiq qo‘ydi
Ozodlikka yuborilgan audioyozuvda Toshloq tumani hokimiga, "Chiqib ket zaldan, yo‘qol!", deya o‘shqirgandi. - Farg‘ona viloyat hokimligi matbuot kotibi esa, hokim toshloqliklarga "jigari kuygani uchun" "alam ustida gapirgani"ni aytgan.
- Undan oldin esa Shuhrat G‘anievning viloyat tibbiyot mulozimlarini "hayvon", deb atagan audioyozuvini Ozodlik e’lon qilgan edi.
- 2016 yil avgustidagi selektorda esa Farg‘ona viloyati hokimi soha rahbarlarining "kallasini sapchaday uzib tashlash" bilan tahdid qilgandi.
- Farg‘ona viloyati hokimi Shuhrat G‘aniev mahalliy jurnalistlar bilan suhbatda ba’zida ijtimoiy tarmoqlarda qo‘pol munosabatda bo‘lganligi haqidagi xabarlar tarqalib qolishini inkor etmagan.
- "To‘g‘ri, rahbar ham inson, u ham xato qilishi mumkin, ammo u hech qachon qo‘l ostidagilarni tahqirlashga qonunan ham, ma’nan ham haqli emas", - degan edi G‘aniev o‘tgan yil yanvar oyida O‘zA muxbiri bilan suhbatda.
- U o‘zini axborot vositalarida tanqid qilishlaridan qo‘rqmasligini ham qo‘shimcha qilgandi.
- Ammo Farg‘ona viloyati hokimi butun boshli tuman ahlini haqoratlagani uchun uzr so‘ragan yoki so‘ramagani ma’lum emas.
- O‘zbekiston prezidenti Shavkat Mirziyoev 2017 yil 15 noyabr kuni o‘tkazilgan hukumat majlisida amaldorlarning mushtumzo‘rligi va so‘kong‘ichligi davlat siyosatiga, prezident siyosatiga qarshi chiqish deb baholanishini aytgan edi.