Исроилнинг Тель-Авив шаҳри яқинида 27 октябрь куни юк машинаси автобус бекатида турган одамларни босиб кетган. Ҳодиса чоғида қирққа яқин киши турли даражада тан жароҳати олган, улардан айримларининг аҳволи оғирлиги айтилмоқда. Жабрланувчилардан бир неча нафари касалхонага етказилган, улардан бири ўша ерда вафот этган.
Қайд этилишича, жабрланувчилар орасида қариялар кўп бўлган: юк машинаси автобус бекати ва у ердаги нафақахўрларни музейга экскурсияга олиб кетаётган автобусга бориб урилгани айтилмоқда.
Полиция вакиллари “тергов ҳаракатларининг барчаси бунинг террор хуружи бўлиши мумкинлигини ҳисобга олган ҳолда олиб борилаётган”ини билдиришган.
Хавфсизлик тузилмалари ходимлари юк машинаси бориб урилган бекат ҳарбий база яқинида жойлашганини қайд этишган.
Исроил нашрларининг хабар қилишича, юк машинаси ҳайдовчиси воқеа жойига ҳали полиция келмасидан туриб у ердаги ёнида қуроли бор фуқаролар томонидан отиб ташланган.