Бу ҳақда Озодликка WhatsApp орқали йўлланган хабарда бозорнинг 70 фоиздан ортиқ қисми ёниб кетгани айтилди.
Бозорнинг соғ қолган қисмида дўкони бўлган савдогарлардан бирининг Озодликка айтишича, маъмурлар ёнғиннинг электр тармоғидаги носозликдан келиб чиққанини айтмоқда.
Исми сир қолиши шарти билан Озодликка сўзлаган бу савдогарнинг сўзларига кўра, ёнғин бозорнинг халқ тилида "Тим" деб аталадиган қисмида чиққан.
"Катта здание эди. Эни 50-60 метр, узунлиги 100 метрдан ошиқ эди. Унинг ичида озиқ-овқатнинг оптоми ҳам бор эди. Катталар кечаси электрдан ўт чиққан, дейишди. Ҳамма нарса ёниб кетибди экан. Лекин ҳеч кимни у ёққа киритишмаяпти", деди марғилонлик тадбиркор.
Бу хабар ортидан Озодлик мухбири озиқ-овқат бозори жойлашган Марғилон Ипакчилар шаҳарчасининг участка нозири Диёрбек, деб тақдим қилинган милиция ходими билан боғланди.
Нозирдан олинган маълумотга кўра, бозорнинг 70 фоиздан ортиқ қисми ёниб битган ва ҳозир тозалаш ишлари давом этмоқда.
"Энди бир ойлардан сўнг ишга тушиши мумкин. Ҳозир ҳеч ким киритилмайди, тозаланаяпти", деди мухбир билан микрофонсиз суҳбатда участка нозири Диёрбек.
Марғилон шаҳар Ёнғин хавфсизлиги хизмати ҳамда ҳокимиятидан бу борада маълумот олишнинг ҳозирча имкони бўлмади.
Шу кунларда Россия ишлаётган марғилонлик меҳнат муҳожири, муқаддам озиқ-овқат бозорида растаси бўлган Ҳакимжоннинг айтишича, мазкур бозорда бу сингари ёнғин тез-тез учрамоқда.
- Менинг билишимча, бу шу бозордаги тўртинчи ёнғин. Ҳар сафар кечаси ўт чиқади, эрталаб борсангиз, ҳамма нарса ёниб, кул бўлган бўлади. Ҳар сафар электрдан чиқди, дейишади ва ҳеч нарсани беришмайди, - дейди ҳозир Россияда юрган марғилонлик меҳнат муҳожири Ҳакимжон.
Унинг сўзларига кўра, собиқ Марғилон ипак комбинатининг иккита биноси ҳозир бозорга айлантирилган.
- Шунинг биттаси озиқ-овқатга берилган. Яна бири яна бир нарсага. Қолган бинолари бузилиб, дўконларга берилган. Расталар бор. Хуллас, бу бозорда ҳамма нарса сотилади, озиқ-овқатдан тортиб, кийим-кечак - ҳамма нарсани топасиз-да, - дейди Ҳакимжон.
- Чунки бундан икки йил олдин ҳам худди шу бозор ёниб кетган. Худди бирданига тўрт тарафидан ўт тушиб, ҳамма нарса ёниб кетганмиш-да ўшандаям. Ким ишонади бунга?! Ҳа, бозорнинг ойнали жойлари бор, ҳамма томони бирдек ёнмайди-ку. Икки йилча бурун ҳам шунақа ёнган, ҳеч нарсани қайтариб беришмаган, ҳамма куйиб қолаверган, - дейди Ҳакимжон.
Шу йилнинг 29 июнга ўтар кечаси Наманган шаҳридаги икки қаватли “Ўзбегим” кафесига ҳам ўт тушган эди. Бу ҳақда хабар берган Озодлик манбасига кўра, тунда бошланган мазкур ёнғинни ҳам ўт ўчирувчилар вақтида ўчира олмаган.
Исми сир қолишини сўраган наманганлик тадбиркорлардан биридан олинган маълумотга кўра, хусусий тадбиркорга тегишли бўлган бу бино ёниши оқибатида 250 миллион сўмлик зарар кўрилган.
