Прагада қозоғистонликларни қўллаб акция ўтказилди
Чехия пойтахти Прага шаҳрининг марказий Вацлав майдонида қозоғистонликларни қўллаб тинч намойиш ўтказилди. Йиғилганлар Қозоғистон мадҳиясини куйлаб, қозоғистонлик намойишчиларга нисбатан зўравонликларни тўхтатишни талаб қилиб, плакатлар кўтариб олишган.
Олмаота марказида ўқ отилмоқда, ўнлаб фуқаро қурбон бўлган
Олмаотанинг Республика майдонида ўқ отилмоқда. Бу ҳақда, гувоҳларнинг сўзларига таянган ҳолда ТАСС ва ВВС хабар берди. 6 январь, пайшанба куни майдонда бир неча юз нафар намойишчи қолган эди.
Ушбу маълумотни “Настояшчее время” телеканалига Қозоғистон-Немис университети профессори Рустам Бурнашев тасдиқлади.
Профессорга кўра, шаҳар шимолидаги Шанироқ микротуманида ҳам тўқнашувлар содир бўлаётган бўлиши мумкин. Олмаота шифохоналарининг бош-юз жарроҳлиги бўлимлари беморларга тўла.
Қозоғистон, фавқулодда ҳолат эълон қилингани муносабати билан мамлакатга хорижликлар келишини вақтинча тўхтатди.
Мактабларда таътил даври 17 январгача узайтирилди, коллеж ва ОТМлар талабалари эса 24 январгача дам олади.
Олмаота: Бир намойишчи ўлганини кўрган мухбир
Озодликнинг қозоқ хизмати Олмаота марказидаги Республика майдонида одамлар ўққа тутилишига доир тафсилотларни маълум қилди.
Журналист Ануар Дониёровга кўра, маҳаллий вақт билан соат 18:43 да Назарбоев шоҳкўчаси тарафдан зирҳли ҳарбий машиналар етиб келган ва аскарлар автоматлардан одамларга ўқ ота бошлаганлар. Ўша пайтда майдонда бўлган фаоллар Марат Туримбетов ҳамда Айгерим Толеужан бу маълумотни тасдиқлашган.
Озодлик мухбирига кўра, у камида бир кишининг ўлганини кўрган. Сиёсий фаол Айгерим Толеужан айтишича, майдонга чиққанларнинг аксарияти қуролсиз ёшлар бўлган.
Намойишчилар махсус инқироз даври штаби тузилишини, КХШТ кучларини киритишдан воз кечишни, ҳукумат истеъфосини, фуқаролик жамияти вакили раҳбарлигида муваққат ҳукумат ҳамда аҳолини провокатар ва мародёрлардан қўриқлаш учун кўнгилли гуруҳлар тузишни талаб қилганлар.
Гувоҳлар гранаталар товушларини эшитганини айтишди. Фаол Марат Туримбетовга кўра, камида 5 киши жароҳатланган.