Украина делегацияси Россия вакиллари билан музокара ҳудудига етиб келди
Украина делегацияси Россия вакиллари билан музокараларнинг иккинчи раундини ўтказиш учун Беларусь билан чегарадош ҳудудга етиб борди. Бу хабарни Россия ҳукуматининг ТАСС агентлиги ҳам тасдиқлади.
Аввалроқ Украина президенти маслаҳатчиси Михаил Подоляк Россия билан музокараларга учиб кетаётган украин делегацияси раҳбари Давид Арахамия билан учишга шайланаётган вертолёт фонида олинган фотосуратни эълон қилган эди.
Украина делегация музокараларнинг иккинчи раундида Россия босиб олган айрим қишлоқ ва туманлардан аҳолининг, ҳеч бўлмаганда аёллар, болалар ва қарияларнинг чиқиб кетиши учун гуманитар йўлак сўрамоқчи.
“Бундан бошқа масалалар вазиятга қараб муҳокама қилинади”- деб ёзди Арахамия Facebook саҳифасида.
Россия билан музокараларнинг биринчи раунди 28 февраль куни бўлиб ўтган эди. Томонлар 5 соатлик музокаралардан сўнг маслаҳатлашув учун тарқаган.
Вайроналар, ёнғинлар, қурбон бўлган тинч аҳоли
"Настояшее Время" телеканали, Украинанинг Россия қўшинлари томонидан ўққа тутилган шаҳарлар ва қишлоқлар акс этган тасвирларни тўплади.
Мамлакат бўйлаб, ҳужумлар оқибатида юзага келган вайроналар, яксон бўлган кварталлар, ҳануз ёнаётган уйлар сони соат сайин ортмоқда.
Зеленский: гал Латвия, Литва, Эстония, Молдова, Грузия, Польшага келиши мумкин
Украина президенти Зеленский, 3 март кунги чиқишида, агар дунё давлатлари Россияни тўхтатмаса, бу ҳужум Украина сарҳадларидан ошиб, қўшни давлатларга ўтиши мумкин, деб таъкидлади:
"Украинадан сўнг, агар биз йўқ бўлсак, Худо кўрсатмасин, – кейин Латвия, Литва, Эстония, Молдова, Грузия, Польшага гал келиши мумкин. Ва улар шундай давом этади. Дунё ўз қудратини кўрсатиши лозим, жанг қилмасдан, одамларни қурбон бермасдан кўрсатиши лозим. Қудрат – бу дипломатиядир".
Путин Украинада ўлган рус ҳарбийлари яқинларига товон пули ваъда қилди
Владимир Путин Украинадаги урушда қурбон бўлганларнинг яқинларига 7 миллион рублдан пул берилишини маълум қилди.
Жароҳат олганларга эса 2 миллион 600 минг рублдан тўланишини айтди.
Шунингдек, Путин Украинада қурбон бўлган доғистонлик жангарига Россия қаҳрамони унвонини берганини маълум қилди ва жанг қилиб юрган ҳарбийларини оқишлади.
Россия 24 февраль тонгидан буён Украинага ҳужумини давом эттирмоқда. Путин таъбирича, бу "ҳарбий амалиёт". Аммо, Украина ва дунё давлатлари буни Украинага ҳужум, деб қораламоқда. Россиядан бу ҳужумни дарҳол тўхтатишни талаб қилмоқда.
