Путин Украинанинг аннексия қилинган ҳудудларида ҳарбий ҳолат жорий қилмоқда
Айни пайтда Россия президенти Владимир Путин аннексия қилинган тўртта ҳудуд – ўзини “ДНР” ва “ЛНР” деб эълон қилган ва босиб олинган Запорожье ва Херсон вилоятлари ҳудудларида ҳарбий ҳолат жорий этиш тўғрисидаги фармонни имзолади. Ҳарбий ҳолат қанча муддатга жорий этилгани аниқланмаган.
Россия Хавфсизлик Кенгаши йиғилишида видео алоқа орқали сўзлаган Путин, бу ҳудудларда ҳарбий ҳолат Россияга қўшиб олинишидан олдин ҳам амалда бўлганини айтди.
Кремл сайтида эълон қилинган фармонга кўра, ҳарбий ҳолат эртага, 20 октябрдан кучга киради.
Херсонда аҳоли Днепр дарёсининг чап қирғоғига кўчирилмоқда
19 октябрь куни эрталаб Херсон аҳолиси вилоятнинг ишғолчи маъмурияти расмийларидан SMS олган, унда Украина армиясининг қарши ҳужуми эҳтимоли сабаб шаҳарни тарк этиш сўралган.
Айни пайтда Киев ва Винница яна Россия ракета ҳужумига тутилди. Шаҳарларнинг ҳаво мудофаа тизимлари ҳаракатга келган.
Киев мэри Виталий Кличко шаҳар осмонида бир қанча ракета уриб туширилганини айтди.
Зеленский Украинанинг Қозоғистондаги элчисини ишдан бўшатди
Президент Владимир Зеленский Украинанинг Қозоғистондаги элчиси Петр Врублевскийни лавозимидан озод қилди. Бу ҳақда президент офиси сайтида ёйинланган фармонда айтилган.
Элчи Петр Врублевский 21 август куни блогер Диас Кузаировга берган интервьюсида Россиянинг ўз мамлакатига бостириб кирганига изоҳ бераркан, Украина “имкон қадар кўпроқ россияликни ўлдириш”га ҳаракат қилишини айтган ҳамда “ҳозир қанча кўп ўлдирсак, фарзандларимизнинг шунча кам ўлдиришига тўғри келади”, деган эди.
Ўшанда Қозоғистон ТИВ Врублевский билан суҳбат ўтказилганини, шундан сўнг Украина элчиси бу гаплар учун узр сўраганини билдирган.
Россия томони Врублевскийни Қозоғистондан чиқариб юборишни талаб қилган, Остона эса у таътилга кетганини маълум қилган. Врублевский ишга қайтгани ҳақида хабар пайдо бўлгани ортидан Қозоғистоннинг Москвадаги элчиси Ермек Кошербаев Россия Ташқи ишлар вазирлигига чақирилган.
Краснодар ўлкасидаги учоқ ҳалокати қурбонлари сони 15 нафарга етди
Россиянинг Ейск шаҳридаги тўққиз қаватли уйга Су-34 ҳарбий учоғи қулаши ортидан ҳалок бўлганлар сони 15 нафарга етган. Бу ҳақда Краснодар ўлкаси губернаторининг ўринбосари Анна Минькова маълум қилди.
Авиаҳалокат туфайли 19 нафар одам тан жароҳати олган, улардан тўрт нафари реанимацияда ётибди. Ҳодиса жойида олиб борилаётган қутқарув ишлари ниҳоясига етган.
17 октябрь оқшомида Ейскдаги тураржой биносига ҳарбий учоқ қулаган. Учувчилар ҳисоботига кўра, авиаҳалокатга ҳавога кўтарилиш вақтида учоқ двигателларидан бирининг ёниб кетгани сабаб бўлган.