Донбассдаги айирмачи раҳбарлар Россияга қўшилиш бўйича референдум ўтказишга чорламоқдалар
19 сентябрь куни Россия дастаклаб келаётган айирмачи Донецк раҳбари Денис Пушилин Луганск вилоятидаги айирмачилар етакчисини Россияга қўшилиш бўйича референдумга ҳамкорликда тайёргарлик кўришга чақирди.
«Ўйлайманки, (референдум ўтказиш) бўйича айрим масалаларда биргаликда ишлашимиз, баъзи ҳаракатларимизни синхронлаштиришимиз керак. Мен айтмоқчи бўлган нарса шуки, республикалар маъмуриятлари, парламентлар биз тайёргарлик кўришимизга имкон берадиган қадамларни ишлаб чиқиши учун уларнинг ҳаракатларини мувофиқлаштириш», - деди телефон орқали сўзлаган Пушлин.
Донбасс минтақасидаги тан олинмаган айирмачи республикалар раҳбарлари 2014 йилдан бери Россияга қўшилиш ҳақида сўзлаб келишади.
Жорий йилда Россия қўшинлари томонидан босиб олинган Херсон ва Запорожье вилоятларида Россия тайинлаган расмийлар ҳам бир неча ойдан бери Россияга қўшилиш бўйича оммавий референдумга ҳозирлик кўрилаётганини айтиб келишади.
Урушнинг дастлабки ойларида Россия кучлари бутун Луганск вилоятини ўз назоратига олганди. Аммо душанба куни Украина расмийлари давом этаётган контратака доирасида минтақадаги қишлоқларнинг бири қайта қўлга олинганини даъво қилишди. Айирмачи Донецк Халқ Республикаси даъвогарлик қилаётган ҳудуднинг катта қисми ҳамон Украина назорати остида қолмоқда. Шунингдек, Киев Херсон ва Запорожье вилоятларидаги айрим ҳудудларни ҳамон ушлаб турибди.
Тайван президенти Цай: Украинага ёрдам бераётганимиздан фахрланаман
19 сентябрь куни Тайван президент Цай Инвэн ўз мамлакати Украинага ўзини ҳимоя қилиш учун курашда ёрдам бераётганидан «фахрланишини» айтди. Президентнинг олдиндан ёзиб олинган шарҳлари Нью-Йоркда бўлиб ўтган Конкордия саммитида эшиттирилди.
«Россия босқинининг қирғинини кузатар эканмиз, Тайван украиналикларга ўз ватанлари ва озодликларини ҳимоя қилиш учун курашда ёрдам беришда роль ўйнаётганидан фахрланади. Саъй-ҳаракатларимизни давом эттиришимиз керак. Авторитаризмдан сабоқ олишимиз, Тайван демократияси ХХР йўқ қилмоқчи бўлган ягона нарса эмаслигини англаб етишимиз керак. Тайван демократиясини ҳимоя қилиш келажакда эркинлик ва инсон ҳуқуқларини сақлаб қолишда муҳим аҳамиятга эга».
Тайван Украинага гуманитар ёрдам йўлида 30 миллион доллардан кўпроқ маблағ ажратган. Шунингдек, мамлакат февраль ойида Россия Украинага бостириб кириши ортидан Ғарб томонидан киритилган санкцияларни қўллаб келади. Хитой оролни ўзига қарашли деб ҳисоблайди.
Цайнинг сўзларига кўра, Тайвань Хитойдан тобора кучайиб бораётган тажовузкор таҳдидларга, жумладан, ҳарбий қўрқитишларига дучор бўлмоқда.
Ғалла шартномаси бўйича Украина қишлоқ хўжалиги маҳсулотлари экспорти 3,9 миллион тоннага етди
Жорий йилинг 22 июль куни Истанбулда ғалла маҳсулотлари бўйича эришилган келишув доирасида Украинанинг қишлоқ хўжалиги маҳсулотлари экспорти кўлами 3,9 миллион тоннага етди. Бу ҳақда 19 сентябрь куни Украина денгиз портлари идораси маълум қилди.
Шартнома доирасида ҳозиргача жами 169 та кема Украинанинг Қора денгиз портларидан Осиё, Европа ва Африка мамлакатларига жўнаб кетган.
Биргина душанба куни Одесса ва Пивденний (Жанубий) портларидан 178 минг тоннадан ортиқ озиқ-овқат юкланган тўрт кема жўнаб кетган.
Украина давлат ахборот агентлигининг душанба куни тарқатган хабарига кўра, Украина аграр сиёсат ва озиқ-овқат вазирининг биринчи ўринбосари Тарас Висоцкий бу йил мамлакатда 67 миллион тоннага яқин ғалла йиғиб олиниши кутилаётганини айтган. Бунинг камида камида 45 миллион тоннаси экспорт қилиниши мумкин. Янги ҳосилларни экспорт қилиш жорий йилнинг октябрь ойида бошланади.
Украина портларидан Қора денгиз орқали халқаро бозорларга озиқ-овқат ва ўғит юбришни қайта тиклаш бўйича Украина ва Россия Туркия ҳамда БМТ билан алоҳида-алоҳида келишув имзолаган эди.
Украина шарқий фронтда контратака бошлади; Россия бир неча объектга зарба берди
19 сентябрь куни Россия армияси Запорожьеда HIMARS ракета тизимларига хизмат кўрсатиб келган заводни йўқ қилганини билдирди. Украина эса шарқий фронтда Россия ҳужумларини муваффақиятли тўхтатиб қолганини даъво қилди.
Россия Мудофаа вазирлиги матбуот котиби Игорь Конашенков душанба куни бўлиб ўтган кундалик брифингда Россия ҳарбий-ҳаво кучлари шарқий фронтда сўнгги 24 соат ичида Донецк вилоятидаги бир қанча Украина объектига аниқ зарба берганини таъкидлади.
Украина қуролли кучлари Бош штаби эса украин қўшинлари Россиянинг Бахмут ва Авдеевка шаҳарларига ҳужумларини тўхтатиш билан бирга, Купянскдаги ҳужумларни қайтараётганини маълум қилди.
Россия Мудофаа вазирлигининг маълум қилишича, рус қўшинлари Украинанинг учта зирҳли техникасига зарба берган ва жанубий Херсон вилоятида Украина ҳарбий-ҳаво кучларининг «Су-25» самолётини уриб туширган. Запорожьеда Америкада ишлаб чиқариладиган HIMARS ракета тизимлари таъмирлаб келинган завод ҳам йўқ қилинган.
Украина жанубидаги ҳарбиқ қўмондонлик Киев кучлари Россиянинг Антоновский темир йўл кўпригини таъмирлаш ҳаракатларига тўсқинлик қилаётгани ҳамда қурол-яроғ ва техника олиб кетаётган баржаларга зарба бераётганини билдирди.