Муфтий тошкентликларни газ ва электрни исроф қилмасликка чақирди
Тўрт кундан бери Тошкентнинг бир қанча туманида газ пасайиши ва иссиқлик таъминотида муаммолар кузатилмоқда. Бу Озодликка келаётган мурожаатлар ва қолаверса, тармоқларни тўлдирган норозилик постларидан ҳам маълум.
Шундай бир пайтда Ўзбекистон мусулмонлари идораси раиси, муфтий Нуриддин Холиқназаров тошкентликларни табиий газ ва электр энергиясини исроф қилмасликка чақиради.
Ўзбекистон мусулмонлари идорасининг Youtube каналига жойланган видеода муфтий Холиқназаров мамлакатда газ ва электр тақчиллиги кузатилаётгани, лекин Тошкентда бу муаммо йўқлигини айтиб, пойтахтликларни электрни исроф қилаётганликда айблайди:
“Керак бўлмаса ҳам ҳамма хонадонни ёритиб қўйиб, керак бўлмаса ҳам ҳамма хоналарни иситиб қўйилаётган бир пайтда қайсидир бир чекка ҳудудимизда, узоқмас яқин қўшни қишлоқда ҳам инсонлар яшаётгани, юртдошларимиз борлигини унутмайлик. Эҳтимол, мен исроф қилмасам уларга ҳам энергия етиб борар, деган Аллоҳдан қўрқишлик, тақво билан турсак эди, бу Аллоҳнинг берган неъматига шукроналик бўларди”.
Айни пайтда Муфтий ҳукумат газ ва электр билан боғлиқ аҳволни яхшилашга ҳаракат қилаётгани айтади.
Вазир ўринбосари пойтахтликлар домларини оралади
7 декабрь куни Уй-жой коммунал хизмат кўрсатиш вазири ўринбосари Озода Жўраева вазирликнинг бир гуруҳ ходимлари билан биргаликда пойтахтдаги кўпқаватли уйларда яшовчилар билан учрашишди.
Яккасарой туманида яшовчи отахон уйида иситиш тизими ёмон эканлигини айтади. Жўраева отахонга муаммолар тез кунларда ҳал бўлишига ваъда беради.
Фейсбук орқали вазирлик саҳифасида жонли ёйин тарзидаги видеога изоҳ қолдирган тошкентликлар ўз уйларидаги иситиш муаммолари ҳақида ёзишган. Жумладан, Бектемир, Юнусобод, Чилонзор туманларида яшовчилар иситиш тизимларидаги муаммоларни ёзишган.
Бир кун аввал Коммунал вазирлик Тошкент, Хоразм ва Фарғонадаги кўпқаватли уйларда иссиқлик таъминоти пасайганини тасдиқлади.
Вазирлик баёнотига кўра, бунга сабаб газ босимининг камайгани ва электр таъминотидаги узилишлар сабаб бўлмоқда.
Муаммо айниқса, учта вилоят - Тошкент, Хоразм ва Фарғонада жиддий сезилмоқда. Ушбу вилоятлардаги 3 та қозонхона газ босими жуда пастлиги сабаб вақтинча ўчирилган.
Расмий хабарда пойтахтда ҳам аҳвол яхши эмаслиги тан олинган. Шайхонтоҳур, Чилонзор ва Учтепа туманларидаги жами 3та иссиқлик етказиб берувчи қозонхоналарда ҳам аҳвол яхши эмас.
Вазирлик мавжуд камчиликларни бартараф этиш бўйича тизимли чоралар кўрилаётганини иддао қилган.
Шикоятчиларни қамоқ билан қўрқитган Жамолитдиновнинг депутатлик ваколати тугатилди
Тармоқларда газ ва электр билан боғлиқ муаммоларни ёзаётганларга қамоқ билан таҳдид қилган Наманган вилояти Янги Наманган тумани Халқ депутатлари Кенгаши котибияти мудири Музаффар Жамолитдиновнинг депутатлик ваколати муддатидан аввал тугатилди.
Унинг ўзи Фейсбукдаги “таҳдидли пости” учун кечирим сўради.
6 декабрь куни Фейсбукдаги саҳифасида эълон қилган постида Жамолитдинов тармоқларда газ ва электр муаммосидан шикоят қилаётган шахслар қамалмагани сабаб нолиётганини таъкидлади:
“Шамда ўтирсанг ҳам уйингда ўтир, ИИБни камерасида эмас.
Совуқда ўтирсанг ҳам бола чақангни олдида ўтир, миллий хавфсизлик камерасида эмас.
Метанга навбатга турсанг ҳам майли Уйчи тумани санчастида навбат турма”. (депутат сўзлари таҳрирсиз берилмоқда)
Депутатнинг бу пости тармоқларда катта норозиликка сабаб бўлди. Орадан кўп ўтмай депутат ўз постини ўчириб ташлади. Бироқ Фейсбукнинг ўзбек сигментида Жамолитдинов шу пости билан бир неча соатда трендга чиқди.
Орадан бир кун ўтиб депутат Жамолитдинов Фейсбук саҳифасида “кечирим пости”ни эълон қилди:
“Мендаги асл мақсад халқни қамалиши билан қўрқитиш ёки таҳдид қилиш эмас, балки тинчлик хотиржамликни қадрига етишга қаратилган эди”.
Собиқ депутат айнан қамоқ билан боғлиқ ҳолатга тўхталганига изоҳ берар экан, унинг ўзи бундан 6 йил аввал 10 ой камоқда ўтирганини ёзган.
Музаффар Жамолитдинов Ўзлидеп партияси аъзоси бўлган. У 2019 йил депутатликка сайланган.
Тошкент ортидан Фарғона водийсидаги газ заправкалари ҳам вақтинча ёпилди
«Ўзтрансгаз» Фарғона водийси вилоятларидаги газ заправкалари 7 декабрь куни соат 11:00 дан вақтинча ёпилганини маълум қилди.
Расман билдирилишича, айни пайтда аҳоли ва ижтимоий соҳа объектларига газ етказиб бериш биринчи навбатдаги масала бўлиб тургани учун мана шундай қарор қабул қилинди.
Бундан аввал пойтахт Тошкентда ҳам газ заправкалари фаолияти тўхтатиб қўйилган эди. Расман билдирилишича, бунга газ босимининг пасайиб кетгани, “коммунал хизматлар мавжуд газ захирасини барча истеъмолчилар орасида тенг тақсимлашга уринишига қарамай, ресурслар етишмаётгани” сабаб бўлган.
“Иложи борича кўпроқ хонадонларни газ ва иссиқлик билан таъминлаш мақсадида, жамоат транспорт воситаларига хизмат кўрсатадиган шоҳобчалардан ташқари, қолган барча автомобилларга газ қуйиш шоҳобчалари вақтинчалик ёпилмоқда”, дейилади хабарда.