Энергия муаммосини ҳал этиш учун Бош вазир раислигида ишчи гуруҳ тузилди
ЎзАнинг 8 декабрда хабар беришича, президент Шавкат Мирзиёев топшириғига асосан, Бош вазир Абдулла Арипов раислигида энергия муаммоларини тезкор ўрганиш ва ҳал қилиб бориш бўйича ҳукумат ишчи гуруҳи тузилади.
Ишчи гуруҳга энергия тақчиллиги муносабати билан юзага келган вазиятни қисқа муддатларда чуқур таҳлил қилиш ва аниқланган камчиликларни бартараф қилиш бўйича тезкор чоралар кўриб бориш вазифаси юкланди.
Бундан ташқари гуруҳ электр ва газни биринчи навбатда аҳолига етказиб бериш заруриятини эътиборга олган ҳолда, мавжуд энергия ресурсларини мувозанатли тақсимлаб боради ва назорат қилади.
Гуруҳга муқобил энергия билан аҳолини ва ижтимоий соҳа объектларини узлуксиз таъминлаш ишларини жадаллаштириш, ижтимоий объектларнинг барқарор фаолият юритишини таъминлаш учун зарур маблағларни ажратиш, уларнинг мақсадли ишлатилишини назорат қилиш, энергия тақчиллиги ва унинг оқибатида юзага келадиган салбий оқибатлар, айниқса иқтисодиётга таъсирини камайтириш мақсадида, комплекс чора-тадбирлар кўриш юзасидан асосланган таклифлар ишлаб чиқиш ва кўриб чиқиш вазифаси ҳам юклатилди.
Президент администрациясида энергетик коллапсдан чиқиш йўллари муҳокама этилди
Ўзбекистонда энергетик коллапсдан чиқиш йўллари президент администрацияси раҳбари Сардор Умрзоқов 7 декабрда ўтказган йиғилишда кўриб чиқилди.
Йиғилишда президент маслаҳатчилари ва бош вазир ўринбосарлари вилоятларга бириктирилди ва уларга газ, электр энергияси, кўмир таъминотини яхшиланишини назорат қилишга кўрсатмаси берилди.
Бундан ташқари Энергетика вазирлиги, Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлигида кун-у тун ишлайдиган штаблар ташкил этиш топширилди. Уларга аҳоли ва иқтисодиёт тармоқларини энергия ресурслари билан мутаносиб таъминлаш масалаларини тезкор ва тизимли ҳал этиш топширилди.
Йиғлишида вилоятларга қўшимча табиий газ, суюлтирилган газ, электр энергияси ва кўмир етказиб бериш масаласи ҳам муҳокама қилинди.
Энергетика тармоғида юзага келган вазиятни енгиллаштириш учун товар газ етказиб бериш ҳажмини суткасига 5 миллион куб метрга оширишга қарор қилинди.
Шунингдек, 2023 йил 1 мартга қадар давлат идоралари тасарруфидаги сиқилган газда ҳаракатланадиган автомобиллардан фойдаланишни тақиқлаш, уларни бензинга ўтказиш;
хорижий давлатлар билан қўшимча табиий газ, электр энергияси, кўмир, мазут харид қилиш бўйича музокараларни жадаллаштириш;
2 ой муддатга Аи-80 бензини импорти учун акциз солиғи ва уни чакана сотиш учун акциз солиғини ҳисоблаш ва ундиришни тўхтатиб туриш;
биржа сотувларига қўйилаётган Аи-80 бензининг кунлик ҳажмини ошириш;
Аи-80 бензини нархининг асоссиз оширилишига йўл қўймаслик, нарх ошиши бошланғич нархнинг 5 фоизидан ортиқ бўлмаслигини таъминлаш.
Тегишли соҳа ва тармоқлар раҳбарларига шу ва бошқа топшириқлар ижросини сўзсиз таъминлаш, қилинган ишлар юзасидан кунлик ҳисобот киритиб бориш топширилди.
Свет учун масъул бўлган тўрт амалдорга ҳайфсан берилди
“Ўзбекистон миллий электр тармоқлари” АЖ бошқаруви раиси Дадажон Исакулов, “Ҳудудий электр тармоқлари” АЖ бошқаруви раисининг биринчи ўринбосари Рўзиқул Райимов, “Қашқадарё ҳудудий электр тармоқлари корхонаси” филиали директори Анвар Музапов ва “Тошшаҳарнур” ДУК директори Умидбек Ражабовга ҳайфсан берилди.
Бу ҳақда хабар қилган Энергетика вазирлиги уларни ўз вазифасига маъсулият билан ёндошмаган раҳбарлар дея атаган.
Вазирлик ушбу амалдорларни долзарб муаммоларни тезкорлик билан бартараф этишда ишларни тўғри ташкил қилмаганликда айблаган:
«Бунинг натижасида энергия тежамкорлик масалаларида камчиликларга йўл қўйилмоқда ҳамда электр таъминотида чекловларни киритишда белгиланган тартибларга риоя этилмаяпти».
Вазирлик айни камчиликлар «истеъмолчиларнинг ҳақли эътирозларига сабаб бўлаётгани»ни таъкидлаган.
Совуқ бошланганидан бери бутун Ўзбекистон бўйлаб электрда узилишлар кучайди. Ҳатто Тошкентнинг айрим туманларида ҳам электр чекловлари кузатилмоқда.
Ўзбекистонда жума-шанбада аномал совуқ бўлади
Жорий йилнинг 9-12 декабрь кунлари Ўзбекистон ҳудудининг катта қисмида аномал паст ҳаво ҳарорати кузатилади.
Бу ҳақда хабар қилган "Ўзгидромет"га кўра,9-12 декабрда кечалари 5-10 совуқ, кундуз кунлари 0-5 даража совуқ, мамлакатнинг шимолида ва чўл ҳудудларида кечалари 17-22 совуқ бўлади.
Аномал совуқ жума ва шанба кунларига тўғри келади. Шу икки кунда баъзи жойларда ҳаво ҳарорати 24 даража совуқгача бўлади.