Севастополда ҳаво ҳужумидан мудофаа тизими ҳаракатга келган
Россия томонидан аннексия қилинган Қримдаги Севастополда эрталаб ҳаво ҳужумидан мудофаа тизими ҳаракатга келган. Севастополда маҳаллий вақт билан эрталаб соат 10 ларда жуда кучли портлаш овози эшитилди.
Телеграм каналларида Тизими ПВО тизими ракеталарининг учирилиши акс этган видеолар тарқалди. Ҳозирча нима бўлганлиги ҳақида бошқа маълумот йўқ.
Сўнгги ойларда Россияга бўлаётган ҳаводан ҳужумлар жиддий тус олмоқда. Дронлар чегарадан 500 чақирим узоқликдаги нишонларга бориб уриляпти.
Тўрт кун аввал Россия жанубидаги Энгельс ҳарбий базасига Украина дронлари ҳужуми оқибатида 3 киши ҳалок бўлгани хабар қилинди. Россия томони иддаосича, ҳаво ҳужумидан мудофаа тизими дронни уриб туширган, бироқ қолдиқларининг қулаши қурбонларга сабаб бўлган.
Украина Ҳарбий ҳаво кучлари қўмондонлиги матбуот котиби Юрий Игнат ўшанда:
“Бу Россиянинг босқинчилиги оқибати. Агар руслар уруш жабҳа ортида ҳеч кимга таъсир қилмайди деб ўйлаган бўлсалар, улар адашади”, - деганди.
Россиянинг тунги дрон ҳужумлари, Киев 16 та дроннинг барчаси йўқ қилинганини билдирди
Россия Украина шаҳарларини ракета ҳужумларига тутишда давом этмоқда. Бутун мамлакат бўйлаб ҳаво ҳужумидан огоҳлантириш сиреналари янграмоқда. Аҳолидан янги йил байрами кунлари бошпаналарда қолиш сўралмоқда. Украина президенти девони Киевга камикадзе дронларининг тунги ҳужуми оқибатлари акс этган тасвирларни эълон қилди.
Хабарга кўра, Эроннинг “Шаҳед” учувчисиз учоғи Кивнинг Голосеевский туманидаги тўрт қаватли маъмурий бинога бориб урилган. Тўққиз қаватли турар-жой биноси ҳам зарар кўрган. Ҳалок бўлганлар ва жароҳатланганлар ҳақида маълумот йўқ.
Киев расмийларига кўра, 30 декабрга ўтар Россия Украинага жами 16 та “камикадзе” дронларини отган.
Украина Ҳарбий ҳаво кучлари мамлакат жануби-шарқий ва шимолий қисмларидан учирилган 16 та дроннинг барчаси йўқ қилган.
Киев мери Виталий Кличко ўзининг Телеграм-каналида еттита дрон пойтахтга қаратилгани, бештаси шаҳар ичида, иккитаси эса Киевга етиб боргунча йўқ қилинганини билдирди.
Бир кун олдина Украина шаҳарлари Россиянинг кўламли ракета ҳужумига тутилганди. Ўнлаб ракеиа ёғдирилганди. Киевлик 79 ёшли Леонид Падкурин ҳужум оқибатида уйи вайрон бўлгани, аммо бахтга кўра ўзи ва 54 ёшли ўғли Александр тирик қолганини айтади. "Кўзимни очганимда, ўнг томонимдаги эшик портлаш зарбидан отилиб кетди, ҳамма ер остин-устин. Бу уруш эмас, бу инсониятга қарши жиноят".
Украина ҳарбийлари бир кун аввал Россия томонидан учирилган 69 та ракетадан 54 тасини уриб туширганини айтишганди.
АҚШнинг Украина ва НАТОга ёрдами кўпаяди
АҚШ президенти Жо Байден мамлакатнинг 2023 молия йили учун бир триллион 700 миллиард долларлик бюджетини имзолади.
Унда Мудофаа вазирлиги учун рекорд маблағ ажратилган, бу жорий йилга нисбатан 10 фоизга кўп, 858 миллиард доллар қўшимча маблағни ташкил қилади. Украина ва НАТО давлатларига ёрдам бериш учун 45 миллиард доллар ажратилади. Бу Байден маъмурияти Конгрессдан сўраганидан кўпроқ. Бюджетга кўра, Киевга ҳарбий ёрдам ҳажми ўтган йилдагидай даражада қолади.
Мудофаа вазирлигига ажратилган маблағларнинг ўртача 140 миллиард доллари қурол-яроғ суғурта илғор ва ишланмаларга, масалан, гипертовушли ракеталарга йўналтирилади.
Bloomberg: уруш бошланганидан бери рус олигархлари 90 миллиард доллардан кўпроқ бойлигини йўқотган
Bloomberg маълумотларига кўра, 24 февраль, уруш бошланган кун, энг бой россияликлар 46, 6 миллиард доллар йўқотган. Ғарб санкциялари жорий қилинганидан кейинги бир неча ой ичида эса улар яна 47 миллиард доллардан махрум бўлишди.
Ноябрь ойи бошида энг бой россияликларнинг кўрган зарари 83 миллиард долларга баҳоланган эди.
Ушбу маълумотлар орасида 25 нафар россиялик ҳам бор сайёрадаги энг бой 500 кишининг активлари ҳақидаги Bloomberg Billionaires Indех рейтингида келтирилган.
Энг катта йўқотишларни президент Путинга яқин бўлган тадбиркор Геннадий Тимченко ва Леонид Михелсон кўрди - ҳар бири 8 миллиард доллардан кўпроқ маблағини йўқотган.
Фоиз нисбатида йўқотишлар бўйича етакчи Ренова компаниялар гуруҳи директорлар кенгаши раиси Виктор Векселбергдир – унинг бойлиги 60 фоиздан кўпроққа камайди ва ҳозирда 11, 2 миллиард долларни ташкил этади.
Йил бошидан бери Роман Абрамович ҳам бойлигининг деярли ярмини йўқотди: унинг бойлиги 18 миллиард доллардан 9, 7 миллиард долларга камайди.
Bloomberg билдиришича, миллиардерлар активларининг қисқариши инфляциянинг ўсиши, марказий банк сиёсатининг кескинлашуви, шунингдек, Россиянинг Украинага қарши уруши ва санкциялар туфайли юзага келган глобал тенденциядир.
Йил давомида сайёрамизнинг энг бой одамлари рўйхатидан фақат биринчи 500 нафар тадбиркор деярли бир триллион 400 миллиард доллар йўқотди.