Buyuk Britaniya inson huquqlari jiddiy buzilishiga mas’ul Rossiyaning 25 fuqarosiga qarshi sanksiya joriy qilganidan keyin besh oy o‘tib, Moskva ham 25 britaniyalikka nisbatan sanksiya qo‘lladi.
Sanksiyalar haqida 21 - noyabr kuni Rossiya Tashqi ishlar vazirligi ma’lum qildi. Ammo vazirlik sanksiyaga yo‘liqqan Britaniya fuqarolari ismini keltirmadi. Vazirlikka ko‘ra, bu 25 - shaxsning Rossiyaga kirishi taqiqlangan.
Ayni paytda, Rossiya Tashqi ishlar vazirligi Britaniya hukumati Rossiya rasmiylariga qarshi 6 - iyul kuni e’lon qilgan jazo choralarini «xayoliy va bema’ni bahonalar» asosida qo‘llangan, deb ta’kidladi.
Iyul oyida Britaniya tashqi ishlar vaziri Dominik Raab iyuldagi sanksiyalar «inson huquqlarini jiddiy ravishda buzgan odamlarga» qaratilganini aytgan edi.
Bu shaxslarning Britaniyaga sayohat qilishiga cheklov qo‘yilgan hamda ularga tegishli bo‘lgan mulklar muzlatilgan.
Britaniya qora ro‘yxatiga kiritilganlar orasida qudratli Tergov qo‘mitasi rahbari Aleksandr Bastrikin, shuningdek, London rasmiylari auditor Sergey Magnitskiyning o‘limiga aloqador, deb hisoblaydigan sudyalar va prokurorlar bor.
21 - noyabr kuni Rossiya Tashqi ishlar vazirligi matbuot kotibi Mariya Zaxarova London sanksiyalagan rossiyaliklar qay asosda tanlanganini ochiqlamagan, deb ta’kidladi.
«Buyuk Britaniya hokimiyatining do‘stona bo‘lmagan harakatlariga javoban va ikki tomonlamalilik tamoyili asosida Rossiya tomoni, Buyuk Britaniyaning Rossiya Federatsiyasiga kirishi taqiqlangan 25 vakiliga qarshi shaxsiy sanksiyalarni qo‘llash to‘g‘risida qaror qabul qildi», deyiladi Zaxarova bayonotida.
«Londonning harakatlari boshqa davlatning ichki ishlariga aralashish va Rossiya adliya tizimiga bosim o‘tkazishga urinish kabi ko‘rinadi», deya qo‘shimcha qildi Zaxarova.
Rossiya rasmiylarini jami 230 million dollar miqdoridagi soliq firibgarligiga qo‘l urishda ayblagan Magnitskiy 2009 - yilda Rossiya qamog‘ida qazo qilgan edi.
Magnitskiy bilan ishlagan taniqli sarmoyador Bill Brauderning sa’y-harakatlari tufayli Magnitskiy ishiga xalqaro miqyosda katta e’tibor qaratildi.
Brauder o‘n yil davomida G‘arb davlatlarini inson huquqlarining poymol qilinishi yoki jiddiy korrupsiya uchun mas’ul shaxslarga nisbatan sanksiya joriy qilishni ko‘zlovchi global Magnitskiy qonunini qabul qilishga undadi.
AQSh ham Magnitskiyning huquqlari jiddiy buzilgan deb topdi va Rossiyaga qarshi sanksiya joriy qildi.
Rossiya Magnitskiyning o‘ldirilgani haqidagi da’volarni uzoq vaqtdan beri rad etib, uning nomi bilan ataluvchi sanksiyalar qonuniga qarshi kurashib keladi. Rasmiy Moskva, hatto Brauder va uning advokatini qator jinoyatlarda, shu jumladan, firibgarlikda aybladi.
Britaniyaning iyul oyida e’lon qilgan sanksiyalari Rossiya bilan shusiz ham yomon bo‘lgan munosabatlarni yanada sovitdi.
Britaniya Rossiyani o‘z hududida «beqarorlashtirishni» ko‘zlovchi harakatlarga qo‘l urishda, jumladan, 2018 - yilda sobiq josus Sergey Skripal va uning qizini zaharlashda ayblab keladi.
Rossiya esa bu ayblovni keskin rad etib keladi.
