Қатар ташқи ишлар вазирлиги воизи: гаровга олинганларни озод қилиш муаммоси ҳал қилинди
Қатар ташқи ишлар вазирлиги воизи ҳамда Ҳамас билан музокараларга яқин бўлган юқори мартабали фаластинлик манбанинг Рейтер агентлигига айтишича, исроиллик гаровга олинганларни келишилган вақтда озод қилишга тўсқинлик қилган муаммо ҳал қилинган.
Манбага кўра, гаровга олинганлар, улардан 13 нафари озод қилинади (бундан аввал 14 исроиллик эди) улар кечқурун Халқаро Қизил Хоч қўмитаси вакилларига топширилади.
Музокараларда воситачилик қилаётган Қатар ҳам бир неча дақиқа олдин ушбу гаровга олинганлар гуруҳини озод қилиш йўлидаги тўсиқлар олиб ташланганини ва гаровдагиларни озод қилиш "бугун кечқурун" бўлиб ўтишини айтди.
Ҳамас матбуот котиби Усама Ҳамдан 25-ноябр, шанба оқшомида бўлиб ўтган матбуот анжуманида Исроил сулҳ битимининг бир қисмини бажармагани ва Исроилнинг "бузғунчиликлари" ҳақида воситачиларни хабардор қилганини айтди.
У шунингдек, гуруҳ жума куни бошланган Миср ва Қатар воситачилигида эришилган сулҳга содиқлигини тасдиқлади.
Ҳамданнинг сўзларига кўра, жума кунидан бери Ғазога жами 340 та ёрдам юк машинаси кириб келган ва бу юк машиналарининг 65 таси Ғазо шимолига етиб борган - бу "Исроил билан келишилганидан ярмидан кам".
Ҳамас гаровга олинганларнинг навбатдаги гуруҳини озод этиш кечиктирилишини билдирди
Ҳамаснинг ҳарбий қаноти гаровга олинганларни озод қилиш кечиктирилганини эълон қилди ва Исроилдан гуманитар ёрдамнинг Ғазо шимолига киришига рухсат беришни талаб қилди.
Хамаснинг ҳарбий қаноти Исроил ёрдам юк машиналарини Ғазо шимолига олиб киришга рухсат бермагунча гаровга олинганларнинг иккинчи гуруҳини озод қилишни кечиктиришга қарор қилганини айтди.
Оташкесимнинг иккинчи кунида Ҳамас гаровидаги 14 исроиллик ва Исроил қамоғидаги 42 нафар фаластинлик озод этилиши кутилатганди.
Франс Пресс агентлигининг Исроил расмийларига таяниб хабар беришича, гаровга олинганларнинг иккинчи гуруҳи ҳақиқатан ҳам Қизил Хочга топширилмаган.
Озод этилиши керак бўлган гаровга олинганлар сони борасида номувофиқликлар юзага келди
Брифингларда бугун озод қилинадиган исроиллик гаровга олинганлар сони ҳақида турлича тахминлар айтилмоқда.
Баъзи исроиллик расмийлар бугун Ҳамас гаровидан озод этилиши керак бўлган исроилликлар сони аввалига 14, ҳозир эса 13 эканлигини билдиришмоқда.
Исроил қамоқхона хизмати бугун эрталаб 42 маҳбуснинг озод этилиши ҳақида баёнот берди ва Исроил армияси воизи бугун тушдан кейин Ҳамас 39 фаластинлик асир эвазига 13 нафар исроиллик гаровга олинганларни озод қилишини айтди.
Миср хавфсизлик манбалари аввалроқ Ҳамасдан шанба куни озод қилинадиган 14 нафар гаровга олинган рўйхатни олганини маълум қилган эди.
Ҳаммаси бўлиб, тўрт кунлик оташкесим доирасида 50 нафар гаровга олинган тўрт гуруҳга бўлинган холда, Исроил қамоқхоналарида сақланаётган 150 фаластинлик эвазига озод қилиниши керак.
Исроил ва Ҳамас ўртасидаги оташкесим 1-2 кунга узайтирилиши мумкин
Миср расмийлари шанба куни Исроилнинг Ҳамас билан сулҳ муддатини бир ёки икки кунга узайтириши мумкинлиги ҳақида икки томондан ижобий сигналлар олганини маълум қилди.
Бу ҳақда Рейтер агентлиги хабар қилди.
Миср Давлат Ахборот Хизмати раҳбари Диаа Рашван ўз баёнотида мамлакат барча томонлар билан тўрт кунлик сулҳни узайтириш бўйича келишувга эришиш учун фаол музокаралар олиб бораётганини билдирди.
Бу эса Равшанга кўра, “Ғазодаги кўпроқ маҳбуслар ва Исроил қамоқхонасидаги фаластинлик маҳбусларнинг озод этилишини англатади”.